Olardan 100 keli sıntetıka shyqqan
İshki ister mınıstri Erjan Sádenov Májiliste ótken Úkimet saǵatynda esirtkimen kúres jaıly aıtty, dep habarlaıdy almaty-akshamy.kz Azattyq Ruhy-na silteme jasap.
«Dúnıejúzinde myńnan astam esirtki túri bar. Qazaqstanda 700-ge jýyq esirtki analogy bar. Eldegi esirtki ahýalyna úsh negizgi faktor áser etedi. Olar: kannabıs shıkizaty, soltústik baǵyt arqyly ótetin aýǵan geroıni jáne sıntetıkalyq esirtkiniń taralýy. 2019 jylǵa deıin esirtkiniń tizimi tek zań deńgeıinde retteletin. Tıisti normalarǵa ózgeris engizý bir jylǵa jýyq ýaqyt alatyn. Bul esirtki taratýshylarǵa qoldanystaǵy zańnamany aınalyp ótýge múmindik beretin», - dedi ol.
Mınıstr ataǵandaı, qazirgi tańda eldegi barlyq esirtkiniń túri baqylaýǵa alyndy.
«Olardy tizimge qosý prosedýralary bir aı ishinde júzege asyrylady. Elimizde esirtkiniń jańa túri paıda bolmaı turyp baqylaýǵa alynady. Sońǵy 5 jylda sıntetıkalyq esirtkini tárkileý 10 keliden 1 tonnaǵa deıin kúrt ósti. Qazir esirtki qylmystary tolyǵymen kıberkeńistikke qaraı ótti. Kıberqadaǵalaý júıesi arqyly anyqtalǵan esirtki saıttary buǵattalady», - dedi Sádenov.
Mınıstr esirtkini jarnamalap, nasıhattaǵany úshin qylmystyq jaýapkershilik engizilgenin aıtty.
«Bıyl 4 transulttyq uıymdasqan qylmystyq top joıyldy. 14 top qatysýshysy qylmystyq jaýapkershilikke tartyldy. Olardyń 13-i - sheteldik azamattar. Olardan 100 keli sıntetıka, 85 tonnadan astam prekýrsor jáne myńnan astam zerthanalyq qural tárkilendi. Quqyq qorǵaý organdary 75 esirtki zerthanasyn joıdy», - dedi Erjan Sádenov.