30-dan astam qazaqstandyq magıstrant pen doktorant «Abaı-Vern» baǵdarlamasy boıynsha fransıada tegin bilim ala alady
«Abaı-Vern» utqyrlyq bilim berý baǵdarlamasyna qatysý úshin ótinishterdi qabyldaý bastaldy. Baǵdarlama boıynsha 30-dan astam qazaqstandyq magıstrant pen doktorant Fransıada tegin bilim ala alady. Utqyrlyq baǵdarlamasy koronavırýstyq pandemıaǵa baılanysty moratorıı engizilgennen keıin bir jyl ótken soń qaıta júzege asyryla bastady. Bilim jáne ǵylym mınıstri Asqat Aımaǵambetov pen Fransıanyń Qazaqstandaǵy elshisi Dıde Kaness Franko-qazaqstandyq stıpendıa týraly kelisimge ózgerister engizý týraly hattamaǵa qol qoıdy, dep habarlady Almaty-akshamy.kz QR Bilim jáne ǵylym mınıstrliginiń saıtyndaǵy habarǵa silteme jasap.
2021-2022 oqý jylynda ekinshi kýrstyń 30 magıstranty jáne Qazaqstan men Fransıadaǵy ǵylymı jetekshilermen birlesip dısertasıa daıyndaıtyn 5 doktorant «Abaı-Vern» stıpendıasynyń ıegeri atana alady.
«Abaı-Vern» stıpendıasy magıstranttar men doktoranttarǵa fransýz jáne aǵylshyn tilderinde Fransıa ýnıversıtetterinde oqý úshin beriledi. Úmitkerlerdiń fransýz joǵary oqý ornyna nemese ǵylymı-zertteý ortalyǵyna magıstratýra men doktorantýra baǵdarlamalary boıynsha oqýǵa aldyn ala qabyldanǵandyǵy týraly rastaý haty bolýy tıis», - dep atap ótti QR BǴM Halyqaralyq yntymaqtastyq departamenti dırektorynyń m.a. Elmıra Asan.
«Abaı-Vern» stıpendıasyn jeńip alǵan magıstranttarǵa Ulttyq bank baǵamy boıynsha aı saıyn 800 evro, doktoranttarǵa 1200 evro mólsherinde stıpendıa tólenedi. Sondaı-aq stıpendıattar Fransıadaǵy ýnıversıtet jataqhanasynda oryn alýǵa artyqshylyqty quqyqtarǵa ıe bolyp, uzaq merzimdi stýdenttik vıza jáne fransýzdyq áleýmettik saqtandyrý júıesine tegin tirkele alady.
«Abaı-Vern» akademıalyq utqyrlyq baǵdarlamasy boıynsha qujattardy qabyldaý 2021 jyldyń 4 shildesine deıin jalǵasady. Kandıdattardy irikteýdi franko-qazaqstandyq táýelsiz komısıa júrgizedi.
«Abaı-Vern» - bul QR Bilim jáne ǵylym mınıstrligi men Fransıanyń Eýropa jáne syrtqy ister mınıstrliginiń birlesken stıpendıalyq baǵdarlamasy. Kelisimge qol qoıylǵan kezden bastap 158 qazaqstandyq magıstrant pen doktorant bedeldi «Abaı-Vern» halyqaralyq stıpendıasynyń ıegeri atanǵan.