Tıisti zań jobasy ázirlenip jatyr.
Ǵylym jáne joǵary bilim mınıstri Saıasat Nurbek jańa mınıstrliktiń negizgi jumys baǵyttaryn atady, dep habarlaıdy Almaty-akshamy.kz Egemen.kz silteme jasap.
Onyń aıtýynsha, ǵylym salasyndaǵy negizgi mindetterdi Memleket basshysy Qasym-Jomart Toqaev Almatyǵa sapary kezinde Ulttyq ǵylym akademıasynda aıtqan.
«Birinshisi – Ulttyq ǵylym akademıasynyń mártebesin qaıtarý jáne nyǵaıtý. Bul jumyspen belsendi aınalysyp jatyrmyz. Tıisti zań jobasy ázirlenip jatyr. Ekinshi úlken baǵyt – ýnıversıtet pen JOO-daǵy ǵylym. Qazir ókinishke qaraı, ýnıversıtet ǵylymy negizgi ǵylym bola almady. İrgeli, qoldanbaly ǵylymdy qorektendiretin alańǵa aınalmady. Bul iske de bar kúsh-jigerimizdi salamyz», - dedi Saıasat Nurbek Úkimet otyrysynan keıin jýrnalıserge bergen suhbatynda.
Sonymen birge, vedomstvo qyzmetiniń taǵy bir mańyzdy baǵyty – ǵylymı-zertteý jáne tájirıbelik-konstrýktorlyq ázirlemelerdi nemese qoldanbaly zertteýlerdi qoldaý jáne qarjylandyrý.
«Bul jerde bizdiń mınıstrlik pysyqtap jatqan birneshe júıeli sharalar bar. Jaqyn arada osynyń barlyǵyn ashyq talqylaımyz. Biz ózimizdiń ǵylymı qaýymdastyǵymyzdan, negizgi JOO-nyń profesorlyq-oqytýshylyq quramynan bazalyq tehnıkalyq tapsyrma alamyz», - dedi Saıasat Nurbek.