14 maýsym – Dúnıejúzilik qan donorlarynyń kúni
Bireýge jaqsylyq jasap, kómektesýdiń joly da, tásili de kóp. Sonyń biri donor bolý deýge ábden bolady. Aýrýhanalarda, perzenthanalarda táýlik boıy qanshama adam qanǵa zárý bolyp jatady deseńizshi?! Oǵan aıaq asty bolatyn jazataıym jazymdar men jol apaty sıaqty oqys oqıǵalar kezindegi jaraqattyń saldarynan qan joǵaltýdy qosyńyz. Qan - adam ómiriniń nári. Qan toqtasa, sizdiń ómirińizdiń de joly úzilýi múmkin. Sol sebepti donorlardy ómir syılaýshylar dep tekke aıtpasa kerek. Almaty qalalyq Qan ortalyǵy jyl saıyn Dúnıejúzilik qan donorlary kúnin aıyryqsha atap ótip, qala turǵyndarynyń densaýlyǵyn jaqsartý men ómirin saqtap qalýǵa qan berý arqyly járdemdesip júrgen belsendi donorlaryna jurtshylyq atynan rahmet aıtyp, olarǵa qurmet kórsetýdi ózderiniń dástúrlerine aınaldyrǵan.
Qan ortalyǵy ashylǵan on segiz jyldan beri qan qyzmetin jaqsartý isi boıynsha aýqymdy ister atqaryldy. Qalamyzdaǵy emdeý mekemelerin qaýipsiz qan ónimderimen qamtamasyz etý úshin qan jáne onyń komponentterin daıyndaýdyń zamanaýı ádisteri men tásilderi, qan taldaýdyń jańa standarttary qoldanysqa engizildi. Almaty qalalyq qan ortalyǵy Almaty qalasy men Almaty oblysy boıynsha jıyrmadan astam emdeý mekemelerin qan ónimderimen qamtamasyz etip keledi. Búginde ortalyqqa kelip qan tapsyratyn erikti donorlardyń da qatary ósip, olardyń sany úsh esege artqan.
- Bul - bizdiń halyqtyń da donor bolý bireýge qan berý ǵana emes, óz densaýlyǵyńdy jaqsartyp, salaýatty ómir saltyn ustanýǵa ózińdi tárbıeleýdiń jarqyn joly ekenin túsine bastaǵany. Óıtkeni deni saý adam ǵana donor bola alady. Sondyqtan biz óz densaýlyǵy arqyly ózgeniń densaýlyǵyn jaqsartýǵa úles qosyp júrgen donorlarymyzǵa alǵysymyz sheksiz. Qurmetimiz zor. Olarǵa rahmet aıtyp, kóptiń alǵysyn jetkizý - bizdiń azamattyq paryzymyz. Búgingi saltanatty jıyn donorlarymyzǵa degen qurmetimizdiń bir parasy ǵana, – deıdi ortalyqtyń dırektory Jandos Qýanyshbekuly Nádirov.
Donorlardy qurmetteýge arnalǵan saltanatty jıynǵa qalalyq qoǵamdyq densaýlyq basqarmasy basshysynyń orynbasary Nazgúl Melsqyzy Imanǵalıeva qatysyp, qan tapsyrý arqyly naýqas jandarǵa ómir nárin syılap júrgen donorlarǵa alǵysyn bildirip, olarǵa ortalyqtyń Alǵys haty men estelik syılyqtaryn tabys etti. «Rahmet saǵan, donor!» degen júrekjardy alǵysqa ıe bolǵandardyń qatarynda V. Zommer, A.Satımov, B. Chınıbekova, Q.Zarqumov, R. Akıshev, M. Getmanchýk, A. Seıitqojaev sekildi turaqty donorlar bar.
Qazir ortalyq donorlarynyń sany 15 myńǵa jetse, donasıa sany jıyrma myńdy qurap otyr. Al bıylǵy Dúnıejúzilik qan donorlary kúniniń úndeýi «Donor bolý - bizdiń yntymaqtastyǵymyzdyń aktisi. Donor bolyp, ózgege ómir syıla!» Siz de osy úndeýge ún qosyp, donor bolyp, bireýge ómir syılaýǵa asyǵyńyz! Adamǵa ómir syılaýdan artyq qaıyrymdy is bolmas, Olaı bolsa, qoldan keler iske asyǵaıyq!