Aqtóbe oblysynda evakýasıalyq beket dep tanylǵan jáne sýǵa ketken nemese sýǵa ketý qaýpi bar mektepterde sabaq qashyqtan uıymdastyrylady, dep habarlaıdy Almaty-akshamy.kz.
Aqtóbe oblystyq bilim basqarmasynyń basshysy Jaıyq Sultan 1 sáýirde oqý prosesiniń qalaı uıymdastyrylatynyn habarlady.
«Evakýasıa pýnkteri retinde qyzmet etip jatqan bilim berý uıymdarynda oqý prosesi — qashyqtan, al basqa sý qaýpi tónbegen mektepterde sabaq qalypty jaǵdaıda ótedi», - dedi ol.
Qazirgi ýaqytta Aqtóbe oblysyndaǵy 32 bilim berý uıymynda sý tasqynynan zardap shekken turǵyndar ornalastyrylǵan.
Onda barlyǵy 3 myńnan astam adam bar bolsa, onyń teń jartysy — bala.
Sonymen birge sýǵa ketken jáne sýǵa ketý qaýpi bar mektepter tiziminde Oıyl aýdanynda 14, Temirde 5, Qobdada 6, Hromtaýda 2 mektep bar.
Eske salsaq, buǵan deıin Aqtóbe oblysy boıynsha Qobda, Oıyl, Áıteke bı, Muǵaljar, Temir aýdandary men Aqtóbe qalasynda tótenshe jaǵdaı jarıalandy.