10 qarashada Astanada jerebe tastaldy, shara barysynda Prezıdenttikke kandıdattardyń teledebatynda sóz sóıleý tártibi anyqtaldy. Resmı sharaǵa barlyq úmitkerlerdiń shtab basshylary qatysyp, rettik nómirlerin tańdady.
Jerebe nátıjesinde besinshi bolyp quqyq qorǵaýshy Saltanat Tursynbekova sóz sóıleıtini belgili boldy. Pikirsaıys 11 qarasha kúni saǵat 20:00-de «Habar» telearnasynan tikeleı efırde kórsetiledi.
Onda úmitkerler saılaýaldy baǵdarlamalarymen tanystyryp, bir-birine suraqtar qoıady, sondaı-aq qazaqstandyqtardyń saýaldaryna jaýap beredi. Úmitkerlerge suraq qoıǵysy keletinder 10 qarashaǵa deıin telearnanyń arnaıy elektrondy mekenjaıyna uzaqtyǵy 1 mınýttan aspaıtyn beınejazba joldaýy tıis.
Eske salaıyq, Saltanat Tursynbekova - qoǵam qaıratkeri, quqyq qorǵaýshy, eki balanyń anasy. Ol sońǵy jyldary elimizde eń kóp talqylanatyn jáne rezonansty taqyryptardyń biri – otbasyndaǵy zorlyq-zombylyqpen kúresýdegi kóp jylǵy qajyrly eńbegimen tanymal.