Ol kanaldyń qubyryna turyp qalyp, tunshyǵyp qala jazdaǵan
Túrkistan oblysynyń Kentaý qalasynda kanalǵa qulap ketken eki jasar búldirshin qutqaryldy. Bul týraly oblystyq TJD baspasóz qyzmeti málim etti, dep habarlaıdy Almaty-akshamy.kz.
Departament málimetinshe, oqys oqıǵa 30 sáýir kúni keshki saǵat 19:47 shamasynda bolǵan. Ol kanaldyń qubyryna turyp qalyp, tunshyǵyp qala jazdaǵan.
«Búldirshin Kentaý qalasy, Hantaǵy aýylyndaǵy kólemi 500 mm bolatyn sýarý qubyryna qulap ketkeni týraly habarlama túsken. Oqıǵa ornyna barǵan kezde eresekterdiń qaraýynsyz qalǵan bala qubyrǵa 15 metr qashyqtyqta turyp qalǵany anyqtalǵan. Ony qutqarý sharalaryna oblystyq TJD 3 qyzmetkeri jáne 1 birlik tehnıka shyqqan. Qutqarýshylar qubyrǵa kirip, balany alyp shyqqan. Sóıtip jedel járdem qyzmetkerlerine tabystady», - delingen habarlamada.
Dárigerler balanyń jaǵdaıyn ortasha dep baǵalaǵan. Qazir búldirshin medısına qyzmetkerleriniń jiti baqylaýynda.