Referendým partıalyq demokratıanyń negizgi quraly
Qazaqstanda Konstıtýsıanyń úshten bir bóligin ózgertýdi kózdeıtin túzetýlerdi maquldaý máselesi boıynsha konstıtýsıalyq referendým ótkiziledi.Bul týraly QR Prezıdenti janyndaǵy QSZI aǵa ǵylymı qyzmetkeri Janar Sanhaeva málimdedi, dep habarlaıdy Almaty-akshamy.kz.
«Qazaqstanda Konstıtýsıanyń úshten bir bóligin ózgertýdi kózdeıtin túzetýlerdi maquldaý máselesi boıynsha konstıtýsıalyq referendým ótkiziledi. Konstıtýsıalyq reforma jónindegi jumys tobynyń usynystaryna sáıkes túzetýler kóptegen júıeli máselelerge qatysty bolady. Reforma sheńberinde bıliktiń barlyq tarmaqtarynyń fýnksıalaryn ońtaılandyrý, olardyń ókilettikterin ózara da, ortalyqtan bastap jergilikti basqarý organdaryna da qaıta bólý júrgiziledi. Bir aıta keterligi, basqarý formasy da ózgeredi, sýperprezıdenttik basqarý formasynan Prezıdent birdeı qashyqtyqtaǵy oıynshy retinde qarastyrylatyn prezıdenttik formaǵa kóshiriledi dep jobalanýda», – dedi Janar Sanhaeva.
Sonymen qatar azamattardy elektoraldyq múmkindikter arqyly eldiń qoǵamdyq-saıası ómirine keńinen tartýǵa baǵyttalǵan saılaý erejeleri ózgeredi. Osylaısha, konstıtýsıalyq reformalardyń máseleleri memlekettik qurylystyń negizgi qaǵıdattary men barlyq azamattardyń múddelerin qozǵaıtyn bolady. Sondyqtan demokratıalandyrýdyń odan arǵy baǵyttary týraly sheshimdi azamattardyń ózderi qabyldaýy mańyzdy.
«Referendým týraly sheshimniń ózi Memleket basshysynyń qoǵamdyq shartty pishimdeý jónindegi óz saıasatyn jalǵastyrýǵa degen beıildiligin rastaý bolyp tabylady. Referendým partıalyq demokratıanyń negizgi quraly bola otyryp, bılik pen qoǵam arasyndaǵy áreketterdi úılestirý basty orynǵa qoıylatyn qoǵamdyq qatynastardy qaıta qurýdyń mańyzdy aktisine aınalady. Bir aıta keterligi, Qazaqstandaǵy sońǵy jáne jalǵyz referendým 1995 jyly ótkizildi, saılaýshylardyń 90,6% qatysýy jaǵdaıynda jańa Konstıtýsıaǵa 90,0%-y qoldaý kórsetildi. Sondyqtan da bolashaq saıası modeldi anyqtaýǵa búkil halyqty keńinen tartý turǵyndardyń júrip jatqan prosesterge áser etýiniń sheshýshi faktory bolady», – dedi sarapshy.