Qaıǵyny bólisseń – azaıady
Qasym-Jomart Toqaev Túrki memleketteri uıymynyń «Apat jáne tótenshe jaǵdaılar menedjmenti, gýmanıtarlyq kómek» atty kezekten tys samıtinde sóz sóıledi, dep habarlaıdy Almaty-akshamy.kz.
«Biz baýyrlas Túrkıaǵa úlken aýyrtpalyq ákelgen asa joıqyn jer silkinisine baılanysty jınaldyq. Myńdaǵan baýyrymyz qaza tapty. Marqumdardyń týǵan-týystaryna jáne búkil Túrkıa halqyna taǵy da kóńil aıtamyn», - dep sózin Túrkıadaǵy zilzaladan qaıtys bolǵan marqumdardyń jaqyndaryna kóńil aıtýdan bastaǵan Memleket basshysy elimiz aǵaıynnyń basyna kún týǵanda qol qýsyryp otyra almaıtyn halyq ekenin aıtty.
«Alapat zilzalanyń zardabyn tartqan Túrik eliniń qaıǵysy – barsha túrki jurtynyń qasireti dep bilemin. Qazaqta «Qaıǵyny bólisseń – azaıady» degen sóz bar. Aǵaıynnyń basyna kún týǵanda, bizdiń halqymyz eshqashan qol qýsyryp otyrmaıdy. Qazaqstan halqy birden túrik baýyrlarǵa qol ushyn sozdy. Qutqarýshylarymyz jáne dárigerlerimiz dereý kómekke attandy. Qajetti quraldarmen jabdyqtalǵan eń tájirıbeli, bilikti mamandarymyz qutqarý jumysyna atsalysty. Baýyrlas elge gýmanıtarlyq jáne qarjylaı kómek kórsetildi», - dedi Q.Toqaev.