Tótenshe jaǵdaı, dúleı zilzala nemese ónerkásiptik apat bolǵan jaǵdaılarda vahtalyq jumystyń merzimi uzarady.
Májilistiń qaraýyna engizilgen «QR keıbir zańnamalyq aktilerine áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasynda osylaı jazylǵan, dep habarlaıdy Almaty-akshamy.kz QazAqparatqa silteme jasap.
«Tótenshe nemese soǵys jaǵdaıy engizilgen, dúleı zilzalanyń nemese óndiristik apattyń aldyn alý ne olardyń zardaptaryn dereý joıý úshin ne memlekettik organdardyń nemese olardyń laýazymdy adamdarynyń sheshimi boıynsha karantındi engizý kezinde, sondaı-aq jumyskerlerdiń ómiri nemese densaýlyǵyna qater tóndiretin basqa da erekshe jaǵdaılarda jumys berýshi jumys ýaqytynyń belgilengen uzaqtyǵyn saqtaı otyryp, joǵaryda kórsetilgen jaǵdaılar joıylǵanǵa deıin vahtanyń uzaqtyǵyn arttyrýǵa quqyly», - dep jazylǵan jańa redaksıada.
Eńbek jáne halyqty áleýmettik qorǵaý mınıstrliginiń túsindirme qujatynda mundaı bastama úzdiksiz qyzmet etetin óndiris, seh jáne ýchaskelerdegi jumysty tolyq qamtamasyz etý maqsatynda engizilgeni aıtylǵan. Degenmen bul oraıda qyzmetkerdiń jumys kestesi men tynyǵý ýaqyty saqtalady.
Sonymen qatar atalǵan zań negizinde QR Eńbek kodeksine ózgeris engizý usynyldy. Oǵan saı, endi ýaqytsha eńbekke jaramsyzdyǵy boıynsha 1 aıǵa tólenetin áleýmettik járdemaqy 15 AEK-ten (51 750 teńgeden) 25 AEK-ke (86 250 teńgege) deıin ulǵaımaq.