2023 jyly Salyqtyq ákimshilendirý júıesi engiziledi. Bul týraly Úkimet otyrysynda QR Qarjy vıse-mınıstri Erjan Birjanov aıtty, dep habarlaıdy Almaty-akshamy.kz Inform.kz-ke silteme jasap.
«Taýarlardy baqylap otyrý júıesin odan ári jetildiretin bolamyz. Onyń aıasynda salyqtyq jáne kedendik ákimshilendirý júıelerin tolyq ıntegrasıalaý josparlanýda. 2023 jyldyń sońyna deıin Salyqtyq ákimshilendirý júıesi jáne Integrasıalanǵan derekter bazasy tájirıbelik paıdalanýǵa engiziledi. Keıinnen bul júıeler «Astana-1», «E-tereze» jáne kedendik ákimshilendirýdiń jańa júıesimen ıntegrasıalanatyn bolady. Sonymen qatar, belsendi qyzmetterdi aldyn ala kórsetý boıynsha jumystar júrgizilýde. Ol úshin biz ekinshi deńgeıdegi bankterdiń mobıldi qosymshalaryn paıdalanamyz. Nátıjesi salyq salý júıesin ońaılatý, onyń ishinde qyzmetterdi aýtsorsıngke berý jáne óz servısterimizdi damytý bolýy tıis», - dedi ol.
Vıse-mınıstrdiń atap ótýinshe, bıyl bir tereze qaǵıdaty boıynsha Ahýaldyq ortalyq pen Elektrondyq deklarasıalaý ortalyǵyn biriktirý jolymen Bas dıspecherlik basqarma quryldy.
«Eýrazıalyq ekonomıkalyq odaqtyń kedendik shekarasynda ornalasqan 9 avtomobıl jáne 1 temirjol ótkizý pýnktterin jańǵyrtý júrgizilýde. Jańǵyrtylǵan ótkizý pýnktterinde ıntegrasıalanǵan kedendik baqylaý júzege asyrylatyn bolady. Sonymen qatar, navıgasıalyq plombalar keńinen qoldanylatyn bolady. Bul jalǵan tranzıtti boldyrmaıdy», - dedi Erjan Birjanov.