Taǵam ónimderin tańdaǵan kezde asa muqıat bolǵan jón, dep habarlaıdy Almaty-akshamy.kz bag kz silteme jasap.
Azyq-túlik qaýipsizdigi máselesiniń ózektiligi jyl saıyn artyp keledi. Óıtkeni tamaq ónimderiniń qaýipsizdigin qamtamasyz etý – bul adamdardyń densaýlyǵyn anyqtaıtyn negizgi faktorlardyń biri ekeni anyq. Osy oraıda sanıtarlyq-epıdemıologıalyq baqylaý organdary gıgıenalyq talaptarǵa sáıkestikke saraptama júrgizý úshin ónimderdiń qaýipsizdigine monıtorıń júrgizip otyrady.
Taýardyń kesindisin jáne qaterdi baǵalaýdy eskere otyryp, baqylaý kezinde tamaq ónimderiniń et, balyq, kondıterlik ónimder, sút syndy barlyq túrleri qamtylady. Monıtorıń nátıjeleri boıynsha 2021 jyly tamaq ónimderiniń synamalarynyń 2239-y zertteldi. Onyń ishinde ımporttyq óndiris 70%-dy, otandyq óndiris 30%-dy qurady. 183 synama talaptaryna sáıkes kelmedi. Onyń 64%-y ımporttyq, 36%-y otandyq óndiristen anyqtaldy, - dep atap ótti vedomstvonyń baspasóz qyzmeti.
Departament taratqan derekterge súıensek, talaptardyń buzylýy arasynda 30%-dan 70%-ǵa deıin taǵam óndirýshilerdiń tańbalaý qaǵıdalaryn ustanbaýy jıi kezdesedi.
Sondaı-aq ónimderde ishek taıaqshasynyń bakterıasy nemese patogendi floranyń anyqtalýy, mıkroorganızmderdiń ruqsat etilgen sandarynan artýy, ıaǵnı «shirýi», «kógerýi» baıqalady. Sonymen qatar tutynýshyny aldaý nemese jańylystyrý arqyly ónimniń quramy boıynsha tańbalaýda málimdelgen ónimge sáıkes kelmeýi, mysaly, janýarlar DNQ-nyń nemese GMO tabylýy oryn alǵan. Ókinishke qaraı, jaramdylyq merzimi ótken tamaq ónimderin satý óte jıi kezdesedi, - dedi departamentte.
Saýda nysandary jetkizýshilerden tez buzylatyn kondıterlik, daıyndaý kúni men jaramdylyq merzimi kórsetilmegen, qujattarsyz ónimderderdi qabyldaý jáne odan ári satý jalǵasýda. Bul jaǵdaılar juqpaly aýrýlar men tamaqtan ýlanýdyń paıda bolýy men taralýyna ákelip soqtyratyny aıtpasa da túsinikti.
Saýda jelilerinde syrtqy túri boıynsha sáıkessizdikter, saqtaý jáne tańbalaý sharttarynyń buzylýy sıaqty buzýshylyqtar anyqtalǵan jaǵdaıda aýmaqtyq sanıtarıalyq-epıdemıologıalyq baqylaý organdaryn habardar etý qajet.