Sý resýrstary jáne ırrıgasıa mınıstri Nurjan Nurjigitov pen Ǵylym jáne joǵary bilim mınıstri Saıasat Nurbek sý salasynyń mamandyqtary máseleleri boıynsha birlesken keńes ótkizdi.
Kezdesýge joǵary oqý oryndary men ǵylymı-zertteý ınstıtýttarynyń ókilderi de qatysty, dep habarlaıdy almaty-akshamy.kz.
"Bolashaq" baǵdarlamasyna ózgerister engizilip, oǵan "Gıdrogeologıa", "Sý resýrstary" jáne Sý qaýipsizdigi" sekildi sý salasynyń mamandyqtary qosyldy. Nátıjesinde, bıyldan bastap qazaqstandyq stýdentter atalǵan mamandyqtar boıynsha shetelde bilim ala alady.
Búginde Qazaqstanda 10 oqý orny sý salasynyń mamandaryn daıarlaıdy. Al qazir sý mamandyqtary boıynsha 2500-ge jýyq stýdent oqıdy.
"Biz úshin sý salasy mamandyǵyn tartymdy etý mańyzdy. 2024 jyldyń basynan beri sý sharýashylyǵy qyzmetkerleriniń eńbekaqysy orta eseppen 22%-ǵa ósti. Bul Sý resýrstary jáne ırrıgasıa mınıstrligi ázirlegen is-sharalardyń arqasynda múmkin boldy. Sonymen qatar, otandyq sý salasynyń kadrlyq áleýetin arttyrý úshin mınıstrlik sý sharýashylyǵy mamandaryn qaıta daıarlaýdy jáne olardyń biliktiligin arttyrýdy josparlap otyr", – dedi Nurjan Nurjigitov.