Qazirgi tańda Qazaqstan ulttyq quramasynyń qorjynynda Parıj Olımpıadasynyń 19 lısenzıasy (sporttyń 8 túrinen) bar (sadaq atý – 4, veloshosse – 3, nysana kózdeý – 5, qazirgi bessaıys – 2, boks – 2, grek-rım kúresi – 1, erkin kúres – 1, sporttyq gımnastıka – 1). Olımpıa oıyndaryna deıin 69 lısenzıalyq jarys qaldy. Onyń ishinde 5 álem chempıonaty, 7 Azıa chempıonaty jáne 57 reıtıńtik týrnır bar.
Aqpan aıynda Ulttyq qurama sportshylary sporttyń 18 túri boıynsha 17 lısenzıalyq jarysta óner kórsetedi. Dzúdo, semserlesý, sporttyq gımnastıka, aýyr atletıka jáne batýttaǵy gımnastıka boıynsha synǵa túsetin sportshylar Parıj Olımpıadasynyń joldamasyn reıtıńtik upaı beretin jarystarǵa qatysý arqyly jeńip alatyn bolsa, sý sporty túrleri, boks, jeńil atletıka ókilderi tórtjyldyqtyń basty jarysyna irikteý týrnırleri arqyly tikeleı joldamaǵa ıelik etedi.
«Bıylǵy jyldyń basty sporttyq oqıǵasy dep 26 shilde men 11 tamyz aralyǵynda Parıjde ótetin jazǵy Olımpıa oıyndaryn aıtýǵa bolady. Ár tórt jylda bir ret ótkiziletin Olımpıadaǵa álemniń 205 elinen 10 myńnan astam sportshy qatysady dep josparlanǵan. Parıjdegi dodada 32 sport túrinen 329 medal jıyntyǵy sarapqa salynady. Qazaqstan ulttyq quramasy Olımpıadaǵa sporttyń 20 túrinen qatysýdy josparlap otyr. Sondyqtan qazirgi tańda basty maqsat – qysqa merzimde meıilinshe kóp lısenzıa alý. Qurama kóshbasshylary ár sport túriniń ereksheligi, sportshynyń qajettiligi, medısınalyq-bıologıalyq turǵyda qamtamasyz etilgeni, onyń ishinde fızıoterapıa, ońaltý men jaraqattardyń aldyn alý, psıhologıalyq qoldaý jáne jarysqa daıyndyq kezinde kúızelisti jeńý sıaqty jaǵdaılar eskerilgen jeke jospar boıynsha daıyndalady», - dedi týrızm jáne sport mınıstri Ermek Marjyqpaev.