Saıasat Nurbek Almatyda joǵary oqý oryndarynyń rektorlarymen jataqhana máseleleri boıynsha jınalys ótkizdi, Almaty-akshamy.kz
Búgin jumys sapary aıasynda QR Ǵylym jáne joǵary bilim mınıstri Saıasat Nurbek Almatynyń jetekshi ýnıversıtetteriniń rektorlarymen jáne ınvestorlarmen kezdesý ótkizdi. Kezdesýge ortalyq jáne jergilikti memlekettik organdardyń basshylary, «Qarjy ortalyǵy» AQ jáne Jobalyq keńseniń ókilderi qatysty.
Kezdesýde joǵary oqý oryndaryn jańa oqý jylyna daıyndyǵy jáne stýdentterdi baspanamen qamtamasyz etýge baılanysty máseleleri talqylandy. Stýdenttik jataqhanalarda oryn tapshylyǵy máselesin sheshýge, qoldanystaǵy jataqhanalardy jańǵyrtýǵa jáne stýdentterdiń jaılylyǵyn arttyrý úshin jańa tehnologıalardy engizýge erekshe nazar aýdaryldy. Sondaı-aq, jańa stýdenttik jataqhanalardyń qurylysyndaǵy progres qarastyrylyp, Almatyda stýdenttik jataqhanalardyń qurylysy boıynsha jobalardy iske asyrýmen aınalysatyn jobalyq keńseniń jumysy týraly aqparat usynyldy.
Saıasat Nurbek stýdentter úshin jaıly ómir súrý jaǵdaılaryn jasaýdyń mańyzdylyǵyn jáne oryn tapshylyǵy máselesin sheshýdiń ózektiligin atap ótti. Bul másele Almatydaǵy Úkimet pen joǵary oqý oryndary úshin basymdyq bolyp tanyldy. Mınıstr stýdenttik jataqhanalardy salý jáne jańǵyrtý boıynsha jobalardy iske asyrý, sondaı-aq ósip kele jatqan suranysty eskere otyryp, jataqhanalardy damytýdy ońtaıly josparlaý úshin ýnıversıtettermen belsendi áriptestik qajettigin aıtty.
«Kórip otyrǵanymyzdaı, búgingi tańda Almaty joǵary oqý oryndarynda oqýǵa nıet bildirýshiler kóbeıip keledi. Almaty qalasyndaǵy joǵary oqý oryndarynyń derekteri boıynsha qajettilikke boljaý jasaldy, 32 718 tósek-oryn qajet eken. Bul jańa qabyldaýdy esepke almaǵandaǵy boljam. Osyǵan baılanysty ótken jylǵy tájirıbeni jáne osy másele boıynsha táýekelderdi eskere otyryp, jan-jaqty sharalar qabyldaý qajet. Joǵary oqý oryndarynyń basshylaryna 15 tamyzǵa deıin barlyq josparlanǵan jóndeý jumystaryn aıaqtaýdy, sondaı-aq korpýstarda, jataqhanalarda, asqanalarda jáne sanıtarıalyq toraptarda tolyq dezınfeksıalaý jumystaryn júrgizýdi tapsyramyn», - dedi mınıstr.
Kezdesýge qatysýshylar joo-lardyń stýdenttik jataqhanalarynyń qurylysy belsendi túrde jalǵasyp jatqanyn jáne qazirgi ýaqytta jataqhanalardaǵy oryn tapshylyǵyn joıý maqsatynda ınvestorlarmen kelissózder júrgizilip jatqanyn atap ótti.
Kezdesý sońynda QR ǴJBM qalalyq ákimdik, ýnıversıtetter jáne basqa da múddeli taraptar arasynda joo jataqhanalaryndaǵy oryndardyń jetispeýshiligi máselesin oıdaǵydaı sheshý jáne stýdentter úshin jaıly ómir súrý jaǵdaılaryn jasaý úshin odan ári tyǵyz yntymaqtastyq qajettigi atap ótildi.
Ary qaraı mınıstr Saıasat Nurbek Abaı Ýnıversıtetine bardy. Kezdesý barysynda rektor Darhan Bilálov ýnıversıtet ınfraqurylymyn damytý tujyrymdamasy týraly tolyq aqparat berip, «EdSmart Premium LED Doska» ınteraktıvti beınejazbasynyń mýltımedıalyq stýdıasy men KazDual observatorıasynyń jumysyn kórsetti. Eki nysan da ozyq tehnologıalarmen jabdyqtalǵan jáne oqý prosesinde belsendi qoldanylady.
Sonymen qatar mınıstr ýnıversıtettiń qabyldaý komısıasynda bolyp, Óner, mádenıet jáne sport ınstıtýtynda shyǵarmashylyq emtıhandardyń ótkizilýimen jáne jumys barysymen tanysty. S. Nurbektiń aıtýynsha, joǵary oqý oryndarynyń bilimi men damýyna quıylǵan nvestısıalar Qazaqstan Úkimeti úshin basymdyq bolyp tabylady. Ol Abai University damý josparlaryn iske asyrýdy qoldap, onyń odan ári qaraı ósýine yqpal etetinin málimdedi.