Talapkerlerdiń ata-analary óz oılaryn aıtty.
İİM Maqan Esbolatov atyndaǵy Almaty akademıasyna kandıdattardy irikteý kezeńiniń aıaqtalýyna az qaldy, – dep habarlaıdy Almaty-akshamy.kz Polisia.kz-ke silteme jasap.
Vedomstvalyq joǵary oqý ornyna túsý prosesi ashyqtyq prınsıpi boıynsha talapkerlerdiń ata-analary men jaqyndarynyń, qoǵamnyń tikeleı qatysýymen ótti. Basty konkýrstyq baǵdarlama aıaqtaldy, normatıvterdi tapsyrýdan keıin kelesi, ıaǵnı appelásıadan ótý kezeńi bastaldy, sonyń aıasynda ata-analarǵa kezekti ret akademıa qabyrǵasynda jınalyp, oqý mekemesiniń basshysymen kezdesý múmkin boldy. Oqý ornynyń bastyǵy Aıdar Saıtbekovpen sóılesý barysynda ata-analar qaýymy óz emosıalaryn jasyrmaı, abıtýrıenttik kampanıanyń jaqsy uıymdastyrylǵany jáne júrgizilgeni týraly jaqsy pikir bildirdi.
«Bastapqyda qobaljyp júrdik, shyny kerek, kúmán boldy. Qazir bolsa, onyń bári seıilip, taza, ádil ótkenine qýanyshtymyz. Bizdiń ádildik bar ekenin 100 paıyz kózimiz jetti. Rızamyz! Myń alǵys! Barlyq sharalarǵa qatysýǵa ruqsat bergenderińizge rızamyz, mundaı buryn-sońdy eshqaıda bolmaǵan», – degen ortaq baǵa berdi ata-analar.
Akademıa bastyǵy jańa eksperımentaldy formattaǵy talapkerlerlerdi qabyldaý kampanıasynyń İshki ister mınıstri Marat Ahmetjanovtyń qoldaýymen júzege asyrylǵanyn atap ótti.
«Aldaǵy ýaqyttaǵy bizdiń kásibı jáne ǵylymı jetistikterimizdiń myqty irgetasyn qalaıtyn mańyzdy jáne jaýapty jumystar kezeńi bastaldy», – dep oıyn túıindedi Akademıa basshysy Aıdar Saıtbekov.