Ań da ańqaý emes
Búginde oblysta jyrtqyshtar kóbeıip, olardyń sany 3 myńnan asyp jyǵyldy. Qazir maımaq aıaqtylar ásirese omartashylardyń mazasyn ala bastaǵan, dep habarlaıdy «Habar 24».
Glýbokoe aýdanyndaǵy Stepnoı,Topıha aýyldary mańynda ara sharýashylyǵymen aınalysyp júrgender shyǵynǵa ushyrap jatyr.
Sarapshylardyń sózinshe ara uıasyn buzyp júrgen kóbinese qonjyqtar. Óıtkeni negizinen aıýlar adamdardyń terıtorıasyna emes, kerisinshe adam olardyń aýmaǵyna kirip ketken. Onyń ústine bir ret baldyń dámin tatqan jyrtqysh ol jerge qaıtara kele beredi.
Máselen jaz shyqqaly beri aıýlar Alekseı Ýstınsevtiń omartasyndaǵy alty uıany talqandap ketipti. Qazir ol sharýashylyǵyn kólikpen kúzetetin bolǵan. Alaıda ań da ańqaý emes, dál kúzet bosańsyǵan kezdi ańdyp júrip, táttilerdi qoldy etedi eken.
«Olar tipti ıtten de jasqanbaıtyn boldy. Sondyqtan endi ne isterimizdi bilmeı júrmiz. Eń qyzyǵy ara uıalarynyń ishinen eń baly kóbin tańdap,talqandap alyp ketedi. Qazir amalymyz taýysylǵan soń minekı altynshy kún kezektesip omarta basyn kúzetip júrmiz. Sondyqtan tıisti organdar tarapynan qandaıda da bir naqty is-shara bolsa degen tilegimiz bar»,-dedi omartashy Alekseı Ýstnısev.
«Bizge shaǵym túsken soń birden sol jerge baryp óz keńesimizdi beremiz. Aıýlardy túrli ádistermen úrkitip, qorqytyp otyrý kerek. Qatty dybystar shyǵaryp nemese elektr qorǵandaryn quryp qoıǵan durys. Aıýdy atsa, óz ómirin qorǵaý úshin bolsa da atqan adam qylmystyq jaýapkershilikke tartylady. Óıtkeni zań solaı»,-deıdi «Óskemen orman sharýashylyǵy» QMM qyzmetkeri Sergeı Osınsev.