Bokstan álem chempıonatynyń kúmis júldegeri baspanaly boldy
Pavlodar oblysynyń ákimi Ábilqaıyr Sqaqov álemdik birinshilikte aımaq pen eldiń namysyn abyroımen qorǵaǵan sportshyny quttyqtady, dep habarlaıdy Almaty-akshamy.kz inbusiness.kz-ke silteme jasap.
Serbıa astanasy - Belgrad qalasynda ótken álem chempıonatynda Serik Temirjanov 57 kelige deıingi salmaq dárejesinde qolǵap túıistirdi. Jekpe-jek jolynda Mońǵolıa, Japonıa, Úndistan, Reseı jáne Kýbanyń myqty sportshylaryn qapyda qaldyrdy. Al aqtyq synda amerıkalyq Djamal Harvıden aılasyn asyra almaı, kúmis medal enshiledi.
Elge oralǵan júldegerdi aımaq basshysy Ábilqaıyr Sqaqov qabyldap, oblys ortalyǵynan páter kiltin tabystady.
«Seniń barlyq jekpe-jegińdi kórdim. Ulttyq quramanyń qorjynyna salǵan kúmis medal altynǵa para-par. Osy jetistigińmen oblystyń boks tarıhynda jańa paraqty ashtyń. Bul - bokstan álem chempıonattarynda jeńip alǵan pavlodarlyqtardyń alǵashqy medali. Jerlesterimizdiń qatarynan alǵashqy bolyp «QR bokstan eńbek sińirgen sport sheberi» atanýyń da mereıimizdi asyrdy. Jattyqtyrýshylaryńmen birge jańa belesterdi baǵyndyryp, jazǵy Olımpıadada jeńiske jetedi dep senemin», - dep izgi tilegin bildirdi Ábilqaıyr Sqaqov.
Óz kezeginde Serik Temirjanov aldaǵy ýaqytta kúmisin altyn medalǵa almastyrý úshin aıanyp qalmaıtynyn aıtty.
«Olımpıadadan keıin biz kóp eńbek ettik jáne álemdik týrnırde jaqsy óner kórsettik dep oılaımyn. Munymen toqtap qalmaımyn. Bolashaqta kúmis medaldi altynǵa aınaldyrǵym keledi. Bizdi qoldaǵan barlyq jankúıerlerge alǵys aıtamyn», - dedi júldeger.
Osy oraıda sportshynyń tálimgeri Azamat Maqajanov Seriktiń álem chempıonatyna barýdyń ózi ekitalaı bolǵanyn alǵa tartty.
«Serik ulttyq quramadaǵy sparrıngter kezinde jaqsy nátıje kórsetip, myqtylyǵyn dáleldedi. Sol kezde Boks Federasıasynyń vıse-prezıdenti Baqtıar Artaev "Týrnırge daıyndalyńdar, biraq Serik mindetti túrde medal alýy kerek" dedi. Bul mindetti abyroımen oryndadyq», - dedi jattyqtyrýshy.
Aıta keteıik, Serik Temirjanov bıyl Tokıo Olımpıadasyna da qatysqan edi. Ókinishke qaraı, bul básekede medalǵa qol jetkize almady.
Dese de, sol tusta da oblys ákimdigi iltıpat bildirip, «Oblys aldynda sińirgen eńbegi úshin» belgisin tabystaǵan bolatyn. Jalpy, Pavlodar oblysynyń boks tarıhynda Serik Temirjanov - álem chempıonatyna qatysqan ekinshi sportshy. Sonaý 1993 jyly Nıkolaı Kýlpın 91 keliden joǵary salmaqta judyryqtasyp, shırek fınalda jeńilgen edi. Araǵa 28 jyl salyp Serik Temirjanov oblysqa kúmis júlde ákeldi.