Semeı ıadrolyq qaýipsizdik aımaǵy (SÁQA) qurylady.
Bul týraly Májilistiń jalpy otyrysynda «Semeı ıadrolyq qaýipsizdik aımaǵy týraly» zań jobasyn talqylaý kezinde QR Energetıka mınıstri Bolat Aqsholaqov málim etti, dep habarlaıdy Almaty-akshamy.kz
«Problemalardy sheshý maqsatynda «Semeı ıadrolyq qaýipsizdik aımaǵy týraly» zań jobasy ázirlenip, tıisti usynystar jasalyp otyr. Osy oraıda burynǵy Semeı ıadrolyq synaq polıgonyndaǵy jumystardyń oryndalýyna jaýapty uıymdy taǵaıyndaý, keshendi ekologıalyq tekserý jáne memlekettik ekologıalyq saraptama nátıjeleri boıynsha normatıvten tys radıasıalyq lastanǵan aýmaqtardyń jáne shartty taza jerlerdiń shekaralary men aýdanyn aıqyndaý eskerilgen», - dedi B. Aqsholaqov.
Zań jobasynda normatıvten artyq radıoaktıvti lastanýǵa ushyraǵan aýmaqtarda arnaıy quqyqtyq rejımi bar Semeı ıadrolyq qaýipsizdik aımaǵyn (SÁQA) qurý jáne olardy ýákiletti uıymǵa paıdalanýǵa berý kózdeledi. Munymen qosa, burynǵy polıgonnyń lastanǵan ýchaskelerin ońaltý, aımaq aýmaǵynda radıasıalyq jaǵdaıǵa monıtorıń júrgizý, burynǵy polıgonnyń shartty taza jerlerin sharýashylyq aınalymǵa berýdi qarastyrǵan.
«Polıgonnyń normatıvten tys lastanǵan jerlerin basqarý jónindegi ýákiletti uıym retinde Energetıka mınıstrliginiń vedimistik baǵynysty uıymy – Qazaqstan Respýblıkasynyń Ulttyq ıadrolyq ortalyǵyn taǵaıyndaý boljanyp otyr. Bul uıym 1992 jyly Tuńǵysh Prezıdenttiń Jarlyǵymen burynǵy Semeı ıadrolyq synaq polıgony kesheni jáne tıisti ǵylymı uıymdar men obektiler negizinde qurylǵan. Kásiporyn 30 jyl boıy atom energıasyn beıbit maqsatta paıdalaný, radıoekologıa jáne ıadrolyq ınfraqurylym obektilerin joıý salasynda aǵymdaǵy qyzmetin júzege asyryp keledi jáne joǵary bilikti personaly, mamandandyrylǵan jabdyqtary, damyǵan ınjenerlik-tehnıkalyq ınfraqurylymy men qajetti ruqsat berý qujattary bar», - dedi mınıstr.
Budan buryn habarlanǵandaı, burynǵy Semeı polıgony mańynda lastanǵan jáne taza aýmaqtardyń arajigi ajyratylmaǵandyqtan, jaramdy jerlerdiń edáýir bóligi paıdalanýsyz qalyp otyr.