Almatyda aǵymdaǵy jylǵy 20 qarashaǵa belgilengen Qazaqstan Respýblıkasy Prezıdentiniń kezekten tys saılaýyna daıyndyq jáne ony durys ótkizý máseleleri jóninde semınar ótti.
Aýmaqtyq jáne ýchaskelik saılaý komısıalary jumysynyń tıimdiligin arttyrýdy maqsat etken is-sharany Qazaqstan Respýblıkasy Ortalyq saılaý komısıasy Almaty qalalyq aýmaqtyq saılaý komısıasy uıymdastyrdy.
Almaty aýmaqtyq saılaý komısıasynyń tóraǵasy Janna Asanova júrgizip otyrǵan semınar jumysyna Ortalyq saılaý komısıasy tóraǵasynyń orynbasary Konstantın Petrov, Almaty qalasy ákimi apparaty basshysynyń orynbasary Qanat Sýhambekov, PD polkovnıgi Dıas Dýanbekov jáne Almaty qalasynyń aımaqtyq ýchaskelik saılaý komısıalarynyń músheleri, QR Prezıdenttigine úmitkerlerdiń saılaýaldy shtabynyń ókilderi, saıası partıalar men qoǵamdyq birlestikterdiń ókilderi, prokýratýranyń, otandyq baqylaýshylar, sondaı-aq BAQ ókilderi qatysty.
Semınar barysynda Ortalyq saılaý komısıasy tóraǵasynyń orynbasary Konstantın Petrov kezekten tys Prezıdent saılaýy el ómirindegi mańyzdy saıası oqıǵa ekenin aıta kelip, slaıd arqyly eldegi saılaý naýqanyna daıyndyqqa qysqasha toqtalyp ótti. Onyń aıtýynsha, Ortalyq saılaý komısıasy elimizdiń barlyq óńirinde 20 qarashaǵa belgilengen Qazaqstan Respýblıkasy Prezıdentiniń kezekten tys saılaýyn ázirleý men ótkizý máseleleri jóninde kezdesýler uıymdastyrdy.
Almaty qalasy ákimi apparaty basshysynyń orynbasary Qanat Sýhambekov saılaý naýqanyn daıyndaý men ótkizýge baılanysty saılaýdy uıymdastyrýshylar qyzmetiniń negizgi aspektilerin, saılaýshylar tizimi boıynsha atqarylǵan jumystar, sondaı-aq, múmkindigi shekteýli jandar úshin saılaý ýchaskeleriniń fızıkalyq qoljetimdiligin jáne daýys berý sharttaryn qamtamasyz etý týraly jan-jaqty baıandady.
– Qazaqstan Respýblıkasy zańdaryna sáıkes Almaty qalasy boıynsha
1179 590 myń saılaýshy tirkelgen. 600 ýchaskelik saılaý komısıasy bar. Onyń 531-i ashyq formattaǵy mekenjaılar bolsa, qalǵan 69-y aýrýhana men áskerı oryndar syndy arnaıy mekemeler. Almatylyqtar saılaýshylar tizimnen ózderin https://mapalmaty.kz saıty arqyly, Open Almaty portalynda nemese Telegram Bot @almaty_sailau2022_bot arqyly tekserip, óz saılaý ýchaskesiniń mekenjaıyn bile alady. Sondaı-aq, 1315 nómirine 8.00-den 20.00-ge deıin qońyraý shalýǵa bolady. Saılaý kúni, ıaǵnı 20 qarashada ótetin kezekten tys prezıdent saılaýynda Almaty qalasy ákimdigi múmkindigi shekteýli azamattardyń esh kedergisiz saılaýǵa qatysýyna jaǵdaı jasaý maqsatynda barlyq jaǵdaıdy qarastyryp otyr. Saılaý kúni 50-den astam ınvataksı qyzmet kórsetedi. Múgedek jandarǵa arnap arnaýly burysh jabdyqtalady, sondaı-aq, pandýstarmen, kire beristerge taktıldi belgiler qoıylady. Aldaǵy saılaýdyń barynsha joǵary deńgeıde ótýi úshin barlyq saılaý ýchaskeleri qajetti jabdyqtarmen qamtamasyz etiledi. Ýchaskelerde mindetti túrde táýelsiz baıqaýshylar bolady, - dedi Qanat Sádýaqasuly.
Almaty qalasy Polısıa departamentiniń ókili Dıas Erkinbaıuly saılaý naýqanyn ótkizýdiń zańdylyǵyn qamtamasyz etý jónindegi sharalarǵa, sonymen qatar saılaý zańnamasynyń normalaryn buzýshylyqtyń quqyqtyq saldaryna nazar aýdardy.
İs-sharaǵa qatysýshylar daýys beretin kúni elektrondy tólqujatty paıdalanýdyń tártibin, ashyq ári ádil saılaý ótkizý maqsatyndaǵy ózekti máselelerdi, saılaý prosesine qatysýshylardyń ózara is-qımyly tıimdiligin arttyrýdyń nysandary men ádisterin, sonymen qatar saılaý kúni ýchaskelik saılaý komısıalary qyzmetiniń uıymdastyrýshylyq aspektilerin talqylady.
Semınar barysynda Almaty aýmaqtyq saılaý komısıasynyń tóraǵasy Janna Asanova spıkerlerdiń sóılegen sózderi, sondaı-aq belsendi pikir almasý qatysýshylardyń barlyǵy úshin paıdaly bolatynyna, semınarda alǵan aqparattardy ýchaskelik saılaý komısıalarynyń músheleri daýys berýdi uıymdastyrý men ótkizý jónindegi ózderiniń tikeleı jumysynda tabysty paıdalanatyndaryna senim bildirdi.
Al Ortalyq saılaý komısıasy tóraǵasynyń orynbasary Konstantın Petrov: «Bizdiń ortaq jáne negizgi maqsatymyz, bul – saıası naýqandy saılaý zańnamasynyń talaptaryna sáıkes ótkizý», - dep semınar jumysyn qorytyndylady.