Fýtbolshy Portýgalıamen kezdesýge daıyndalyp jatyr
Jazǵy transferde fransýz shabýylshysy Kılıan Mbappeniń «Real Madrıd» klýbyna aýysqany belgili. Fýtbolshyny jankúıerlermen tanystyrý saltanaty aldaǵy ýaqytta ótedi, dep habarlaıdy almaty-akshamy.kz
Qazir aıaqdop sheberi Eýropa chempıonatynyń shırek fınalynda Portýgalıamen kezdesýge daıyndalyp jatyr. Mach aldynda fransýz «koróldik» klýbta ózine deıin oınaǵan juldyzdar týraly pikir bildirip, Ronaldýmen salystyratyndarǵa jaýap berdi.
«Men «Real Madrıdke» Krıshtıanýdyń kezekti taraýyn emes, óz tarıhymdy jazý úshin bara jatyrmyn. Krıshtıanýdyń ol jaqtaǵy tarıhy erekshe, tańǵajaıyp, meniki de sondaı erekshe bolǵanyn qalaımyn. Ekinshi Krıshtıaný Ronaldý eshqashan bolmaıdy. Krıshtıaný Ronaldý – meniń kýmırim, ol bútindeı bir urpaqty shabyttandyrǵan adam. Ol ańyz oıynshy. Ronaldýǵa degen qurmetimniń qandaı ekenin bári biledi. Biz únemi baılanystamyz. Ol ańyz bolyp qala beredi, biraq aldaǵy oıynda jeńýge tyrysamyz.
Pepe de «Realdyń» tiri ańyzy. «Portýda» da, Portýgalıa quramasynda da ózin dáleldep tastaǵan. Pepege qarsy oınaý men úshin úlken abyroı», - dedi Mbappe.