Almatynyń Naýryzbaı aýdanynda negizgi áleýmettik nysandar salynyp jatyr, - dep habarlaıdy aqshamnews.kz.
Almaty ákiminiń orynbasary Beıbit Shahanov jumys sapary aıasynda qaladaǵy Naýryzbaı aýdanynda salynyp jáne qaıta jańartylyp jatqan birqatar áleýmettik nysannyń qurylys barysyn tekserdi.
Atap aıtqanda, №7 Qalalyq klınıkalyq aýrýhanany qaıta jańǵyrtý jumystary qyzǵan. Medısınalyq mekeme kórsetiletin qyzmet kólemin qysqartpaı, úzdiksiz jumys istep tur. Qazirgi tańda jańǵyrtylýǵa tıis alty bloktyń úsheýinde negizgi kótergish qurylymdardy seısmıkalyq turǵydan kúsheıtý jumystary qolǵa alynǵan. Joba aıasynda ınjenerlik komýnıkasıalar, qasbet jáne jeldetý júıeleri tolyq aýystyrylyp, aýrýhananyń paıdaly alańy 2,5 myń sharshy metrge ulǵaıtylady. Sondaı-aq, bólimsheler fýnksıonaldyq turǵydan qaıta josparlanyp, zamanaýı medısınalyq qural-jabdyqtarmen tolyqtyrylady.
Jumys sapary barysynda qala ákiminiń orynbasary Shuǵyla shaǵynaýdanynda salynyp jatqan bir aýysymda 500 adam qabyldaıtyn jańa emhananyń qurylys alańyna da bardy. Eresekter men balalarǵa qyzmet kórsetýge arnalǵan medısınalyq nysan ótkel galereıalary arqyly jalǵasqan úsh qabatty tórt bloktan turady. Qazirgi ýaqytta irgetas quıý jáne ár bloktyń qabyrǵasyn betondaý jumystary júrgizilip jatyr. Qurylys jumystary bıyl shilde aıynda aıaqtalmaq.
Sondaı-aq, osy shaǵynaýdanda salynyp jatqan ekinshi tıptegi órt sóndirý deposynyń qurylysyna basa nazar aýdaryldy. Nysan shamamen 90 myń turǵyn men 400-ge jýyq nysannyń órt qaýipsizdigin qamtamasyz etýge arnalǵan. Qazirgi tańda shatyr men qasbetti árleý, qyzmettik turǵyn úıdiń ishki qurylys jáne ınjenerlik jumystary jalǵasyp keledi. Ákimshilik ǵımaratta joǵarǵy qabatty salý men ishki bólimderdiń qurylysy júrip jatyr. Garaj keshenindegi jumystar da bekitilgen kestege saı oryndalyp otyr. Búginde oryndalǵan jumystardyń jalpy kólemi 35 paıyz. Qurylysty osy jyldyń tamyz aıyna aıaqtaý josparlanǵan.
Sonymen qatar jumys sapary barysynda Shuǵyla shaǵynaýdanynda salynyp jatqan 340 oryndyq jataqhanasy bar mekteptiń qurylysy da tekserildi. Nysannyń jalpy daıyndyǵy 92 paıyz bolǵanymen, bekitilgen kesteden úsh aıdan astam ýaqytqa keshigý baıqalady. Qala ákiminiń orynbasary merdiger uıymǵa qosymsha jumys kúshin tartý, aýmaqty kóriktendirý jumystaryn jedeldetý jáne tehnologıalyq jabdyqtardy jetkizýdi tezdetý jóninde tapsyrma berdi.
Beıbit Shahanov barlyq áleýmettik nysan belgilengen merzimde ári sapaly aıaqtalýǵa tıis ekenin atady. Óıtkeni bul nysandar qala turǵyndarynyń jaılylyǵy men qaýipsizdigine tikeleı áser etedi.