Almatyda óńirlik ǵylymdy damytýǵa baǵyttalǵan granttar baıqaýyn iske asyrý josparlanyp otyr.
Granttardyń jalpy kólemi - 348 mln teńge, - dep habarlaıdy aqshamnews.kz.
Bul týraly Almaty qalasy ákiminiń orynbasary Abzal Núkenovtiń Almatynyń damýyna jáne qaladaǵy mindetterdi sheshýge arnalǵan dısertasıalyq jumystar men ǵylymı-zertteý jobalaryn qorǵaǵan avtorlarmen ótken strategıalyq kezdesý barysynda aıtyldy.
Kezdesý forsaıt-sessıa formatynda ótip, ǵylymı ázirlemelerdi megapolısti damytýda tájirıbelik turǵyda qoldanýǵa arnaldy. Sondaı-aq, ǵylymı qaýymdastyq ókilderimen mundaı kezdesýler aldaǵy ýaqytta turaqty túrde ótetini atap ótildi.
Talqylaý barysynda qatysýshylar atmosferalyq aýa sapasyn jaqsartýǵa, kólik júıesin damytýǵa, sondaı-aq maıatnıktik kóshi-qonnyń teris áserin tómendetýge baǵyttalǵan jobasyn usyndy. Atalǵan baǵyttar qalanyń turaqty damýy men turǵyndardyń turmys sapasyn arttyrýdyń basty basymdyqtary retinde belgilendi.
Óz kezeginde Abzal Núkenov qoldaý baıqaý negizinde tek qoldanbaly sıpatta, qalalyq ınfraqurylym men basqarý úderisterine naqty engizýge baǵyttalǵan ǵylymı jobalarǵa kórsetiletinin aıtty.
Kezdesý Almaty qalasy ákimdigi janyndaǵy Ǵylym jáne tehnologıalar keńesiniń qyzmeti aıasynda ótti. Keńes 2025 jyly ǵylymı áleýetti qalalyq saıasatqa júıeli túrde biriktirý maqsatynda qurylǵan. Ǵylymı granttar baıqaýyn ótkizý megapolıstiń áleýmettik-ekonomıkalyq damýyna tikeleı baılanysty zertteýlerdi qoldaýdyń tájirıbelik tetikteriniń biri retinde qarastyrylyp otyr.