2025 jyldyń qorytyndysy boıynsha shamamen 3 myń jetim bala otbasylarǵa ornalastyryldy. Osy shara aıasynda balalardyń qaýipsizdigin qamtamasyz etý maqsatynda memleket qamqorshylardyń senimdiligin baǵalaý men baqylaýdyń jańa modelin engizdi. Instıtýsıonaldyq emes kómekke kóshý qarqyny sońǵy 10 jyldyń statısıkasynan anyq baıqalady. Máselen, osy kezeńde elimizdegi ınternattyq uıymdar jelisi 24%-ǵa qysqaryp, ondaǵy tárbıelenýshiler sany 54%-ǵa azaıdy.
Otbasylyq tárbıeleý formalaryna kóshý qorǵanshylyq jáne qamqorshylyq organdary jumysynyń sapasyn arttyrýdy talap etti. Osyǵan baılanysty atalǵan organdardaǵy mamandar sany 3,3 esege ulǵaıyp, 303 qyzmetkerden 1028 mamanǵa deıin artty. Bul árbir otbasyna jeke súıemeldeý kórsetip, balalardyń ómir súrý jáne tárbıelený jaǵdaılaryn jan-jaqty zerdeleýge múmkindik berdi.
Sonymen qatar 2025 jyldan bastap zańdy ókilderdi irikteý talaptary kúsheıdi. Endi qamqorshylar mindetti túrde jyl saıyn keshendi tekserýden ótedi. Tekserý tabys kózderiniń rastalýyn, densaýlyq jaǵdaıyn, turǵyn úı jaǵdaıynyń sáıkestigin jáne sottylyǵynyń bolmaýyn qamtıdy. Kez kelgen táýekel faktorlary, onyń ishinde zańdy ókildiń sotqa tartylýy nemese psıhonevrologıalyq nemese narkologıalyq dıspanserge esepke alynýy qamqorshylyq mindetinen dereý shettetýge negiz bolady.
Balalardy qoldaýdyń balamaly tetigi retinde tálimgerlik ınstıtýty da júıeli túrde damyp keledi. Búginde elimizdiń 20 óńirinde 360-tan astam tálimger bar. 2025 jyldan bastap tálimgerler úshin mindetti kásibı sertıfıkattaý engizildi. Bul rette balanyń týystyq baılanystaryn saqtaý negizgi basymdyq bolyp qala beredi, sondyqtan eń aldymen ony jaqyn týystaryna ornalastyrý múmkindigi qarastyrylady.
Qazirgi tańda elimizde jetim jáne ata-anasynyń qamqorlyǵynsyz qalǵan 20 798 bala bar, olardyń 82%-y otbasylarda tárbıelenýde.