Qala ákímdígíníń málímetínshe, 1938 jyly salynǵan būrynǵy ǵımaratqa júrgízílgen tehnıkalyq tekseru nátıjesínde tírek qūrylymdary men ınjenerlík jelíleríníń 100 paıyz tozǵany anyqtalǵan. Órt qauípsízdígí, jeldetu, gıdrooqshaulau júıelerí qazírgí zaman talaptaryna saı kelmegen, sondaı-aq nauqastardy tasymaldauǵa arnalǵan jedel saty bolmaǵan.
Jer telímí tektonıkalyq jarylym aımaǵynda ornalasqanyna qaramastan, ǵımaratta bírde-bír ret seısmıkalyq kúsheıtu jūmystary júrgízílmegen. Ǵımarattyń seısmıkalyq normalar talaptaryna sáıkes kelmeıtíní jónínde QazQSǴZI-díń tıístí qorytyndysy bar.
Qūrylymdyq tozudan bólek, nysan medıtsınalyq kómek kórsetu standarttaryna da saı bolmaǵan. Atap aıtqanda, qabyldau bólímínde shūǵyl ota jasaıtyn zal bolmaǵan, patsıentterdí triage (sūryptau) júıesímen qabyldauǵa jaǵdaı jasalmaǵan, operatsıyalyq blok pen reanımatsıyada ınfektsıyalyq baqylauǵa arnalǵan arnaıy úı-jaılar qarastyrylmaǵan.
"Ǵımarattyń írgetasyn kúsheıtu múmkín bolmaǵandyqtan, al kúrdelí jóndeu men ony ūstau ekonomıkalyq tūrǵydan tıímsíz dep tanylǵandyqtan, 1938 jylǵy ǵımaratty súríp, onyń ornyna jańasyn salu turaly sheshím qabyldandy", – delíngen habarlamada.
Jobaǵa sáıkes, jalpy aumaǵy 10 myń sharshy metrden asatyn úsh qabatty jańa ǵımarat salynady. Jańa perzenthana 155 orynǵa eseptelgen. Zamanauı palatalar ana men balaǵa jaıly jaǵdaı jasap, energıya únemdeıtín tehnologıyany engízu paıdalanu shyǵyndaryn azaıtuǵa múmkíndík beredí.
Qabyldau bólímínde shūǵyl ota jasaıtyn bólme qarastyrylǵan, būl kezek kúttírmeıtín kómektí kídíríssíz kórsetuge jol ashady. Operatsıyalyq zaldardyń jalpy sany ekíden tórtke deıín artady. Sondaı-aq, qabyldau bólímíníń quaty táulííge 25-ten 38 ótíníshke deıín ūlǵaıtylady.
Jańa korpus paıdalanuǵa berílgennen keıín kórsetíletín medıtsınalyq qyzmet sany jylyna 11 myńnan 14 myńǵa deıín ósíp, bosanu sany 5 myńnan 9 myńǵa deıín artady dep josparlanyp otyr. Jańa ǵımarat akusherlík, perınataldyq kómek pen jańa tuǵan nárestelerge kútím jasau salasynda ınnovatsıya men ozyq medıtsınalyq tehnologıyany, dáleldí medıtsınalyq tásílderdí engízuge múmkíndík beredí.
"Qūrylys jūmystaryn kelesí jyldyń nauryz aıynda ayaqtau josparlanǵan. Osy kezeńde perzenthana jūmysyn toqtatpaıdy — barlyq bólímshe uaqytsha Seıfullın dańǵylyndaǵy "A" blogyna ornalastyrylady".
Almaty ákímdígí