Premer-mınıstrdíń orynbasary – Ūlttyq ekonomıka mınıstrí Serík Jūmanǵarın Májílís deputatynyń saualyna joldaǵan jauapta memleket bıznestí qoldaudyń strategıyalyq tásílí qolǵa alynǵanyn málím ettí, - dep habarlaıdy Aqshamnews.kz.
- Bıznestí memlekettík qoldaudyń bíryńǵaı strategıyalyq tásílín qalyptastyru jūmysy bastaldy. Qoldanystaǵy sharalarǵa revızıya júrgízílíp, memlekettík qoldau sharalarynyń bíryńǵaı tízílímí qalyptastyryldy. Olardyń tıímdílígín baǵalaıtyn ókílettíkter Ūlttyq ekonomıka mınıstrlígíne beríldí.
Memlekettík qoldau sharalarynyń nátıjelílígín baǵalau kírísterdíń ósuín, jalpy óním kólemín, eńbek ónímdílígín, salyq túsímderín, eksportty jáne jūmys oryndaryn qūrudy qosa alǵanda, ólshenetín kórsetkíshterge negízdeledí. Búgíngí tańda Qarjy mınıstrlígíníń aqparattyq júıelerínde bıznes subektíleríníń mártebesí, salyq júktemesí, basqa qoldau sharalaryna qatysuy jáne byudjet kórsetkíshterí turaly tolyq jáne senímdí aqparat bar. Būl árbír sharanyń tıímdílígín obektıvtí baǵalauǵa múmkíndík beredí, - dep jazylǵan jauapta.
Qoldau sharalarynyń tıímdílígín baǵalau úshín memlekettík organdar men operatorlardyń aqparattyq júıelerín «Baqylauda» aqparattyq júıesíne ıntegratsıyalau arqyly, ekí deńgeılí júıe negízdelgen tsıfrlyq monıtorıng engízílíp otyr.
- Jeke baǵalau alynǵan qoldaudy qarsy míndettemelerdí oryndaumen salystyru arqyly júrgízíletín bolady. Monıtorıng nátıjelerín ŪEM memlekettík qoldau sharalarynyń tıímdílígín taldau kezínde paıdalanady jáne olardy jetíldíru ne tıímsíz qūraldardy alyp tastau jónínde ūsynystar ázírleı otyryp, Úkímet janyndaǵy kásípkerlík qyzmettí retteu máselelerí jóníndegí vedomstvoaralyq komıssıyanyń otyrystarynda jyl saıyn qaralady. Qazír 2027 jylǵy 1 qańtardan bastap tízílímge engízílmegen sharalardy ūsynuǵa tyıym saludy jáne Qarjymıníne monıtorıng boıynsha ókílettíkter berudí qosa alǵanda, osy tásílderdí zańnamalyq bekítu boıynsha jūmys júrgízílíp jatyr. Tıístí túzetuler Tsıfrlyq kodekske ílespe Zańynda kózdelgen, - dep jazady Serík Jūmanǵarın.