Aǵylshyn Premer lıgasynyń chempıony, "Chelsıdiń" burynǵy oıynshysy Nıgerıalyq Vıktor Mozes osy aptanyń sońynda "Qaısar" klýbymen resmı túrde kelisimshartqa otyrady, - dep habarlaıdy Aqshamnews.kz.
35 jastaǵy Vıktor “Qasqyrlar” sapynda 2026 jyldyń sońyna deıin óner kórsetpek.
Derekkózderdiń málimetinshe Vıktor Mozesti jankúıerlerge resmı tanystyrý sharasy 24 qańtar kúni Qyzylorda qalasynda ótedi dep josparlanýda.
Mozestiń fýtboldaǵy joly óte baı ári tabysty. Ol mansabyn Anglıadaǵy "Krıstal Pelas” sapynda bastap, keıinnen "Ýıgan Atletıkte” ózin jaqsy qyrlarynan tanytty. Onyń oıynyna Eýropalyq alpaýyttardyń biri — “Chelsı" qyzyǵýshylyq tanytyp, 2012 jyly óz sapyna qosty.
Onyń basty jetistikteri men klýbtary:
- "Chelsı” sapynda: 2016-17 jylǵy maýsymda Anglıa Premer lıgasynyń chempıony atandy. Klýb sapynda jalpy 10-nan astam gol soqqan.
- Jalǵa berilgen klýbtary: Mansabynyń ár jyldarynda "Lıverpýl", "Stok Sıtı", "Vest Hem", "Fenerbahche", "Inter" jáne "Spartak" sıaqty ataqty ujymdarda óner kórsetti.
Vıktor Mozes jasóspirim shaǵynda Anglıanyń túrli deńgeıdegi quramalarynda oınaǵanymen, keıinnen tarıhı otany Nıgerıany tańdady.
• Nıgerıa quramasymen birge 2013 jyly Afrıka Ulttary Kýbogynda jeńimpaz atandy.
• 2014 jáne 2018 jylǵy Álem chempıonattaryna qatysty.
• Ulttyq qurama sapynda 38 oıyn ótkizip, 12 goldyń avtory atandy.
Bul transfer "Qaısar” klýbynyń ǵana emes, búkil Qazaqstan chempıonatynyń deńgeıin kóterip, jankúıerlerdiń qyzyǵýshylyǵyn arttyratyny sózsiz.