Memleket basshysy Qasym-Jomart Toqaevtyń búgingi Joldaýy kópshiliktiń kóńilinde júrgen máselelerge jaýap berdi. Mundaı pikirdi saıasattanýshy Rasýl Jumaly bildirdi, dep habarlaıdy almaty-akshamy.kz
«Eń bastysy - ishtegi jáne syrttaǵy túrli táýekelderge boı usynbaı, demokratıalyq reformalar jalǵasyn tabady. Ulttyq quryltaıdyń qurylatyny, jergilikti ózin-ózi basqarýdy kúsheıtý men ákimderdi tańdaý, jańa partıalarǵa jol ashý, adam quqyqtarynyń qorǵalýyn jetildirý sekildi naqty qadamdar iske aspaq. Qasym-Jomart Kemeluly sýperprezıdenttik júıeniń eskirgenin alǵa tarta otyryp óziniń partıaǵa múshe bolmaıtynyn málimdedi jáne quzyretteriniń birtalaıyn Parlamentke berip, onyń áleýetin kúsheıtpek»,- deıdi saıasattanýshy.
Sonymen qatar, ol Prezıdenttiń týystaryna memlekettik bılikte nemese ulttyq kompanıalarda, kvazımemlekettik sektorda qyzmet isteýge tyıym salatyn jańa zań qabyldanatynyn quptarlyq is deıdi.
«Prezıdent týystarynyń memlekettik qyzmet pen ulttyq kompanıalarda jumys isteýine tyıym salynady. Barsha Alash balasyn erekshe qýantqan jańalyq - kezinde qysqaryp qalǵan Jezqazǵan, Semeı óńirlerine oblys mártebesin berip, olardy jańǵyrtý, sondaı-aq Almaty oblysyn ákimshilik basqarý júıesin jetildirý úshin ekige bólý. Olarǵa beriletin ataýlardan qazaqy ıis ańqyp tur - tıisinshe Ulytaý, Abaı, Jetisý. Árıne, Prezıdent búgin jasaǵan usynystar men mindetter áldeqaıda keń aýqymda túsinýdi talap etedi. Alaıda qazirdiń ózinde ádiletti qoǵam men el ıgiligin basymdyq retinde alǵan Jańa Qazaqstan tujyrymdamasy iske asyp jatqany kúmán týdyrmas», - dedi Rasýl Jumaly.
Onyń paıymdaýynsha, Prezıdent osy jolǵy Joldaýynda burynnan halyqtyń kókeıinde júrgen máselelerge nazar aýdaryp, olqylyqtardyń aldyn alýǵa tyrysqan.
«Joldaýda eń aldymen burynnan oıda júrgen máselelerdiń sheshiletini qýantty», – dedi saıasattanýshy.