Dala qustary, sý qustary kele bastaǵaly birsypyra ýaqyt boldy. Bulbuldarynyń áýezdi daýsy bıyl qulaqqa erterek jetti. Bul kóktemniń belgisi desek te, ókpek jeldiń, sarqyraǵan seldiń aýyly alda. Adýyndy «Alasapyran» bastaldy.
«Jartysy qudaıdiki, jartysy kedeıdiki» degen naýryz aıy da, mine, bitip bara jatyr. Ótkende «Besqonaqtyń bir kúni» degen amal júrdi. «Maı boran», «Bosaǵa basy» degen janama ataýlary bar. Qystyń bir kúndik sońǵy borany kórinis berdi. Almatyda qar jaýdy, yzǵar, jaýynshashyn boldy. Shóptiń boı kóterýine, aǵashtardyń eski japyraǵynan arylyp, jańasynyń shyǵýyna jańbyrdyń paıdasy bolmasa, zıany joq. Burynǵy sharýalar «Besqonaqty» kútip, qatty saqtanǵan, «Besqonaq» ótisimen arqasyn sál de bolsa keńge salyp, kóktemgi jumystarǵa kirisetin bolǵan. 20-synan bastap «Ábdikeı» amaly kórinis berdi. Qazaq «sıyrdyń oraza ustaýy» dep ataǵan bul amal da atyna saı ótti.
Ótken paıymymyzda «...Apta aıdyń basyn da, ortasyn da, sońyn da qamtyp tur. Bulardyń aýa raıyna áseri bolmaı qalmaıdy. Kúndiz kúnniń kózi jarqyrap turǵanymen túnge qaraı sýytýy múmkin. Sonyń saldarynan kúndiz erigen qar túngi jáne tańǵy aıazben qatyp, muzǵa aınalyp, kóktaıǵaq oryn alýy ǵajap emes... Óıtkeni, bul «Qus qanaty» amaly ǵoı. Qustar kelip jatyr mekenine. Qustardyń qanatymen jel keledi, samal esedi, olarǵa jańbyr men qar ilesedi...» dep jazǵan bolatynbyz. Paıymymyz dál keldi.
Búrsigúni (29 naýryz) qatty daýyl turyp, talaı úıdiń shatyry, qorasy ushyp ketti. Borannyń sońy qarǵa ulasty.
...Kóktemniń alǵashqy aıy – naýryzdyń sońyna qaraı jyly jaqtan qustar qaıtyp kelip jatyr. Olardyń qanatyna ilesken qar men jańbyr, sýyq jel eldiń esin alýda. Muny halqymyz «Qus qanaty» dep ataǵan. Qar erip, jer laısań bolýda.
Bul – «Alasapyran» amalynyń bastalǵany... Qazir aǵashtar búrshigin búrtıtip, tabıǵattyń jylýyn, kóktemniń shýaǵyn tym erte sezinetin órik aǵashtary gúlin ashyp jiberýge ázir tur. Endi birer aptada Almaty shahary gúlge bólenip, nurǵa kenelip shyǵa keledi.
«Qyzyr qamshysy», «Tobylǵy jarǵan», «Qyzyl jumyrtqa», taǵy da basqa amaldar da kóktemniń enshisinde... Olar da óz retimen kele beredi. Áıtse de, ońtústik óńirlerde toń erip, jerdiń kóbesi sógildi.
Búgin qoldanystaǵy kúntizbe boıynsha, naýryz aıynyń 31-i, aı júıesi boıynsha, 27-si, qazaqsha – 18-i. Apta (31 naýryz ben 7 sáýirdiń arasy) aıdyń basy-aıaǵyn túgel qamtyp tur. Bul, árıne, joǵaryda aty atalǵan adýyndy «Alasapyran» amalynyń jaýyn-shashyndy, laısań bolatynyn ańǵartqandaı. Degenmen, aldaǵy aptada ashyq, jyly kúnder de bolatynyn joqqa shyǵarýǵa bolmaıdy. Aspandaǵy qozǵalys, juldyz ben bulttyń qımyly bizge osyny sezdirgendeı. Qalaı desek te, kóktem shyqty.
Az kúnde órik gúldese, artynsha shıe, sosyn alma gúldeıdi. Tabıǵat-Ana meıirimin shashyp, sol jemisterdi el-jurtqa buıyrtsyn! Tabıǵat tosyn minez tanytpasyn. Óńirimizden shattyq, óńimizden kúlki ketpesin!