Halyqaralyq shahmat festıvali 24 tamyzǵa deıin jalǵasady
Atyraýda halyqaralyq shahmat festıvali bastaldy. Osyǵan oraı Qazaqstan Prezıdenti Qasym-Jomart Toqaev týrnır uıymdastyrýshylary men qatysýshylaryna quttyqtaý joldady, dep habarlaıdy Almaty-akshamy.kz QazAqparat-qa silteme jasap.
«Dostar, bizdiń komanda Atyraýda 16-24 tamyz aralyǵynda ótip jatqan «Atyrau Chess Festival – 2022» festıvaliniń uıymdastyrylýyna baılanysty Memleket basshysynan quttyqtaý hat aldy. Prezıdent Qasym-Jomart Toqaev hatynda týrnır uıymdastyrýshylary men qatysýshylaryn quttyqtady. Bul men úshin shynymen úlken mártebe! Bizdiń shara – Qazaqstannyń osy óńirinde ótkizilip jatqan birinshi halyqaralyq shahmat týrnıri. Festıvál uıymdastyrýshysy retinde elimiz Prezıdentine bildirgen senimi úshin erekshe alǵysymdy jetkizemin», - dep jazdy halyqaralyq grosmeıster, Azıa jáne Álem chempıony Dınara Sádýaqasova Facebook-paraqshasynda.
Búgin, 16 tamyzda Atyraýda festıváldiń resmı ashylýy ótti. Jarysqa 300-ge jýyq shahmat áýesqoıy qatysyp jatyr. Onyń ishinde Qazaqstanmen qosa, AQSH, Nıderland, Lıtva, Ýkraına, Tájikstan, Ózbekstan, Belarýs jáne Reseı memleketteriniń oıynshylary bar.
Árqaısysynyń nátıjesi áıgili shveısarıalyq júıemen baǵalanatyn úsh negizgi týrnır ótedi. Festıváldiń resmı saıtynda tirkelý arqyly oıyndy onlaın rejımde kórýge bolady. Sheberlik sabaqtar men bir mezgilde ótetin oıyn seanstary uıymdastyrylady. Budan bólek, festıvál aıasynda tóreshiler emtıhan tapsyryp, FIDE tóreshisi ataǵyn ala alatyn halyqaralyq arbıtrlerdiń alǵashqy semınary bolady.
«Bul festıváldi Qazaqstanda shahmatty sport túri retinde tanymal etý jáne damytý, salaýatty ómir saltyn nasıhattaý, sondaı-aq jas sportshylardyń sheberligin arttyrý men jas talanttardy izdeý maqsatymen ótkizip otyrmyz. Festıváldiń júlde qory 13 mıllıon teńgeden asady. Sonymen qatar, Qazaqstan-Brıtan tehnıkalyq ýnıversıteti (QBTÝ) bakalavrıat pen magıstratýrada oqýǵa grant bóledi. Grant ıegerleriniń esimi týrnırdiń jabylý saltanatynynda jarıalanady», - deıdi Dınara Sádýaqasova.