Kelisim jobasy maquldandy
Qazaqstan úkimeti Nıkaragýa úkimetimen vızalyq talaptardy ózara joıý týraly kelisim jobasyn maquldady, dep habarlaıdy Almaty-akshamy.kz BAQ.KZ-ke silteme jasap.
Qazaqstandyqtar elge alǵashqy kirgen kúnnen bastap árbir 180 kúndik kezeń ishinde Nıkaragýada 30 kúnge deıingi merzimge vızasyz bola alady.
«Ekinshi tarap memleketiniń aýmaǵynda 30 kúnnen artyq bolýǵa ne onyń aýmaǵynda eńbek nemese komersıalyq qyzmetti júzege asyrýǵa nıettengen bir tarap memleketiniń azamattary ekinshi tarap memleketiniń ulttyq zańnamasyna sáıkes talap etiletin tıisti vızany alýy tıis», - delingen qaýlyda.
Nıkaragýa – Tynyq muhıty men Karıb teńiziniń arasynda ornalasqan Ortalyq Amerıkadaǵy memleket. Onyń landshaftyn kólder, janartaýlar men jaǵajaılar quraıdy.
Jaqynda Qazaqstan men Andorra vızalyq talaptardan ózara bosatý týraly kelisimge qol qoıdy. SİM bul bizdiń elderimiz arasyndaǵy alǵashqy úkimetaralyq kelisim ekenin atap ótti.