Álıhan Smaıylov Mıhaıl Mıshýstınmen kezdesti.
Almatyda ótip jatqan «Digital Almaty 2023» halyqaralyq sıfrlyq forýmnyń ekinshi kúni Premer-Mınıstr Álıhan Smaıylov Reseı Premer-Mınıstri Mıhaıl Mıshýstınmen kezdesýimen bastaldy, dep habarlaıdy Almaty-akshamy.kz.
Kezdesýde ótken jyldyń 11 aıynda ózara taýar aınalymy 2021 jyldyń sáıkes kezeńimen salystyrǵanda aıtarlyqtaı óskeni aıtyldy.
Sonymen qatar ónerkásiptik kooperasıanyń damý qarqyny jaqsy, onyń aıasynda jalpy quny $1 mlrd-qa jýyq 26 birlesken joba iske asyryldy. Buǵan qosa, quny shamamen $23 mlrd bolatyn 84 iri joba iske asyrylýda jáne pysyqtalý satysynda. Osy jobalardyń aıasynda 24 myń jumys orny qurylady dep kútilip otyr.
«Reseı men Qazaqstannyń yntymaqtastyǵy baýyrlastyq pen dostyq, sondaı-aq strategıalyq áriptestik qaǵıdattaryna negizdelgen, eki memleket arasyndaǵy qarym-qatynastardy nyǵaıtý Máskeý úshin absolútti basymdyq bolyp tabylady», - dedi Mıhaıl Mıshýstın.
Reseı men Qazaqstan arasyndaǵy ózara saýda tabysty damyp keledi, kórsetkish 10 paıyzǵa ósip, 25,5 mlrd dollarǵa jetti.