1414 qaýyrt jelisinde táýlik boıy 38 kásibı psıholog jumys istedi.
Azamattyq bastamalardy qoldaý ortalyǵynyń basqarma tóraıymy Lıma Dıas tótenshe jaǵdaı kezinde 1414 qaýyrt jelisi arqyly qazaqstandyqtarǵa qoldaý kórsetken psıholog mamandarǵa alǵys hat tabystady, dep habarlaıdy Almaty-akshamy.kz QR Aqparat jáne qoǵamdyq damý mınıstrliginiń baspasóz qyzmetine silteme jasap.
Eske salaıyq, qańtar aıynyń basynda QR Aqparat jáne qoǵamdyq damý mınıstrligi QR Sıfrlyq damý, ınovasıalar jáne aeroǵarysh ónerkásibi mınıstrligimen birlesip, 1414 biryńǵaı koll-ortalyǵy bazasynda jeke telefon jelisin qurǵan bolatyn.
Munda elimizdiń kómekke muqtaj turǵyndaryna kásibı psıhologıalyq kómek kórsetildi. Qaýyrt jeli nómirine habarlasqan barlyq qazaqstandyqtarmen táýlik boıy 38 kásibı psıholog jumys istedi.
«Tótenshe jaǵdaı jarıalanǵan alǵashqy kúnderde bizdiń qyzmetkerler áleýmettik jeliler arqyly qaýyrt jeliniń jumysyna kásibı psıhologtardy tartý qajettigin habarlap, mamandarǵa izdeý salǵan bolatyn. Bizdiń ótinishimizdi jerge tastamaı, azamattarǵa kómek kórsetýge nıet bildirgender az bolǵan joq. Volonter retinde jumys isteýge daıyndyǵyn kórsetken barlyq psıhologtarǵa biz kómekke júgingen turǵyndarǵa qoldaý kórsetkeni úshin óz alǵysymyzdy aıtamyz», - dedi Azamattyq bastamalardy qoldaý ortalyǵynyń basqarma tóraıymy Lıma Dıas.
Psıhologıalyq qoldaý baǵytyndaǵy jumys odan ári jalǵasatyn bolady. Azamattyq bastamalardy qoldaý ortalyǵy basqarma tóraıymynyń aıtýynsha, endi jappaı tártipsizdikterdiń kýási bolǵan jáne psıhologtardyń kásibı kómegine muqtaj balalar men jasóspirimderge kómek kórsetilmek.