«Bolashaq» baǵdarlamasy boıynsha ádebıet mamandyǵyna suranys qandaı?
Bul týraly Májilis depýtattarynyń saýalyna Premer-Mınıstrdiń orynbasary Eraly Toǵjanovtyń jaýabynda aıtylǵan, dep habarlaıdy Almaty-akshamy.kz Elorda.kz-ke silteme jasap.
«Bolashaq» halyqaralyq stıpendıasy aıasynda kadrlar daıarlaý eńbek naryǵyna qajettilikteriniń ortamerzimdi boljamyn eskere otyryp ázirlenetin Basym mamandyqtar tizbesine sáıkes júzege asyrylady. Halyqaralyq stıpendıa iske asyrylǵan 28 jyl ishinde barlyǵy 130 stıpendıa «Fılologıa, lıngvısıka, aýdarma isi» mamandyqtary boıynsha taǵaıyndalǵan. Onyń ishinde 10 stıpendıa «Aǵylshyn tili jáne ádebıeti», «Aǵylshyn ádebıeti», «Til jáne ádebı bilim», «Til jáne medıa», «Zamanaýı tilder men ádebıet» mamandyqtary boıynsha berilgen. Al sońǵy bes jyl aralyǵynda «Fılologıa, lıngvısıka, aýdarma isi» mamandyqtary boıynsha 26 shákirtaqy (bakalavrıat – 1, magıstratýra – 11, doktorantýra – 6, taǵylymdama – 8) taǵaıyndalǵan: Onyń bireýi - «Aǵylshyn ádebıeti» mamandyǵy boıynsha», - dep atap ótti Eraly Toǵjanov jaýabynda.
Vıse-premer dereginshe, qazirgi tańda olardyń ishinen 17-ci oqýyn aıaqtady, 9 stıpendıat bilim alý ústinde. Jalpy, tizbege poezıa men proza, aýdarma men ádebı syn, dramatýrgıa men synı oılaý sıaqty ádebıetke qatysty pánderdiń baǵytyndaǵy magıstr men doktor dárejesin álemniń úzdik ýnıversıtetterinde bilim alýǵa baǵyttalǵan mamandyqtar engizilgen.
Onyń ishinde «Til bilimi jáne ádebıet», «Til, ádebıet jáne mádenıet», «Ádebı til bilimi», «Ejelgi jáne qazirgi tilder men ádebıet», «Qazirgi zaman ádebıeti», «Salystyrmaly ádebıet men mádenıet», «Balalar ádebıeti», «Aǵylshyn ádebıeti», «Klasıkalyq tilder men ádebıet», «Álem ádebıeti aǵylshyn tilinde», «Salystyrmaly ádebıet jáne synı aýdarma», «Jahan ádebıeti men mádenıeti», «Aǵylshyn tili jáne salystyrmaly ádebıettaný», «Ispan tili jáne ádebıeti», «Grek/latyn tilderi men ádebıeti», «Fransýz tili jáne ádebıeti», «Nemis tili jáne ádebıeti», «Latyn Amerıka ádebıeti», «Fransýz jáne roman tilderi men ádebıetteri», «Aǵylshyn ádebıeti: ádebıet jáne qoǵam: aǵartýshylyq, romantızm», «Aǵylshyn ádebıeti: ádebıet jáne qazirgi zaman: 1900 jyldan qazirgi ýaqytqa deıin», «Aǵylshyn ádebıeti jáne Amerıkataný», «Jazba óneri jáne basylym», «Dramalyq jazý», «Ádebıet jáne kıno», «Dramalyq ádebıet, teatr tarıhy jáne kıno» mamandyqtary qamtylǵan. "Depýtattyq saýalda kórsetilgen usynystar eskerile otyryp, tizbedegi «Ádebıet» atalymy boıynsha mamandyqtar sanyn kóbeıtýge nazar aýdarylatyn bolady.
Sonymen qatar jalpy «Bolashaq» baǵdarlamasy aıasynda ádebıet mamandyǵy boıynsha bilim alatyn túlekter sany úmitkerlerdiń osy mamandyqqa qyzyǵýshylyǵyna tikeleı baılanysty ekendigin eskerý qajet. Bul rette Qazaqstan Jazýshylar odaǵy osy mamandyqtar boıynsha iriktep usynǵan talantty qalamgerlerdiń kandıdatýralary zertteledi jáne qoldanystaǵy «Bolashaq» halyqaralyq stıpendıasyn taǵaıyndaý úshin úmitkerlerdi irikteý qaǵıdalaryna konkýrstyq negizde qarastyrylady», - dedi Úkimet basshysynyń orynbasary.