Qazaqstannyń Ulttyq banki eldegi nesıeleý naryǵynyń jaǵdaıyn jarıalady. Bir qyzyǵy málimetterdi ekinshi deńgeıli bankter usynǵan, dep habarlaıdy aqshamnews.kz.
Ulttyq bank qarjylyq turaqtylyq jáne zertteýler departamentiniń dırektory Oljas Kýbenbaevtyń aıtýynsha, úshinshi toqsanda jeke tulǵalar tarapynan ıpoteka men avtokredıtterge suranys artqan. Al kepilsiz nesıeler men kepilmen tutynýshylyq nesıelerge suranys azaıǵan.
«Ipotekaǵa suranystyń ósýin bankter memlekettik baǵdarlamalar aıasynda ótinimder jınaý jáne qurylysshylarmen yntymaqtastyqpen túsindiredi. Ipotekalyq ónimderge suranystyń artýyna básekeles bankterdiń kepildik qamtamasyz etýge qatań talaptar qoıýy da áser etti. Nátıjesinde, jalpy kredıttik ótinimder sany ótken toqsanmen salystyrǵanda 31%-ǵa artyp, 274 myńǵa jetti», — dedi Oljas Kýbenbaev.
Qazaqstandyqtar avtokredıtterge de jıi ótinish bere bastady. Ótken toqsanmen salystyrǵanda bul kórsetkish 10%-ǵa artyp, 1,1 mıllıondy qurady. Bul jaǵdaı avtosalondardyń bankter-partnerler arqyly óz qyzmetterin belsendi túrde jarnamalaýmen de baılanysty.
«2024 jyldyń tórtinshi toqsanynda bankter avtokredıtter men kepilsiz tutynýshylyq nesıelerge suranystyń artýyn kútedi. Al ıpotekaǵa jáne kepilmen beriletin tutynýshylyq nesıelerge suranys óspeıdi», — dep atap ótti O.Kýbenbaev.
2024 jyldyń úshinshi toqsanynda qazaqstandyq bankter bızneske, ásirese orta jáne iri bızneske, nesıelerdi jıi maquldaı bastady. Alaıda, bıznes nesıelerine suranys burynǵy deńgeıde saqtaldy. İri jáne shaǵyn kásiporyndar ótken toqsanmen salystyrǵanda úsh paıyzǵa jıi nesıege júgingen.
Shaǵyn bıznes tarapynan 845 myń nesıelik ótinim kelip tústi, biraq olardyń tek árbir úshinshisi (35%) maquldandy. Orta bıznestiń 41%-y, iri bıznestiń 51%-y kredıt aldy.
Bankterdiń pikirinshe, 2024 jyldyń sońǵy toqsanynda bıznes nesıelerine suranystyń odan ári ósetini kútilýde.