Koreıanyń Chýnchhon qalasynda Devıs kýbogy I álemdik tobynyń pleı-off kezeńi aıasynda Qazaqstan men Ońtústik Koreıa quramalary arasyndaǵy mach bastaldy, - dep habarlaıdy Aqshamnews.kz.
UOK málimetine saı, buǵan deıin qos qurama eki ret kezdesken. 2007 jyly koreılikter 5:0 esebimen jeńiske jetse, 2010 jyly Astanada qazaqstandyqtar dál sondaı eseppen qarymta qaıtarǵan.
Búgin kortqa Aleksandr Shevchenko men álemdik reıtıńtiń burynǵy 19-raketkasy Chon Hón shyqty.
Bir jarym saǵatqa sozylǵan machta Shevchenko 6:4, 6:3 esebimen jeńiske jetti. Bul - onyń Qazaqstan quramasy sapynda Devıs kýbogy aıasynda ótken jekeleı saıystaǵy ekinshi jeńisi.
Shevchenkonyń jeńisiniń arqasynda Qazaqstan komandasy esepte alǵa shyqty. Kelesi bolyp Qazaqstan quramasynyń kóshbasshysy Aleksandr Býblık baq synaıdy. Onyń qarsylasy - 2021 jylǵy ATP 250 Astana Open týrnıriniń chempıony Kvon Sýn Ý.