Ejelgi saqtar dáýirine qatysty tarıhı derekter sheteldik ýnıversıtet qabyrǵasynda qalyń kópshilikke aıtyldy
Arheolog, profesorlar Zeınolla Samashev pen Ábdesh Tóleýbaevtiń leksıasyn tyńdaýǵa osy oqý ornynyń oqytýshylary, stýdentteri jáne basqa da brıtanıalyq ozyq oqý oryndarynan kelgen ǵalymdar jınaldy. Profesorlar bizdiń dáýirimizge deıingi I myńjyldyqta qazirgi Qazaqstan aýmaǵyn mekendegen ejelgi saqtardyń tarıhy men mádenıeti jáne qorǵandarynan tabylǵan altyn artefaktileri týraly baıandady, dep habarlaıdy Almaty-akshamy.kz
«Olar bizdiń tarıhymyzdy, jańa jádigerlerdi bilmeıdi. Tek Keńes Odaǵy kezindegi eskertkishter, jádigerler, derekterden ǵana habardar. Al bizdiń ákelip kórsetken dúnıelerimiz, aıtyp jatqan oılarymyzdyń barlyǵy keıingi 5-10 jyldyń ishinde ashylyp jatqan jańalyqtarǵa negizdelgen. Sondyqtan olar úshin bul óte qyzyq»,- deıdi tarıh ǵylymdarynyń doktory, profesor Zeınolla Samashev.
«Jalpy, saqtardyń tili, olardyń mádenıetiniń sıpaty jónindegi áńgimeler boldy. Biz osy búginge deıin saqtardy «ındoıran», «ındarıı» dep kelsek, bulardyń kóne túrkiler ekendigin, prototúrkiler ekendigin dáleldep sóz qozǵadyq», - deıdi ál-Farabı atyndaǵy Qazaq ulttyq ýnıversıteti, arheologıa kafedrasynyń profesory Ábdesh Tóleýbaev.
«Gıbrıdti» formatta, ıaǵnı oflaın ári onlaın ótken dáriske Kembrıdj stýdentterimen qatar álemniń túkpir-túkpirinen 200-den astam adam qatysty. Arheologıa salasy boıynsha oqyp ári oqytyp júrgen jas ǵalymdar suraqtar qoıyp, tyń aqparattarmen sýsyndady.
«Men UCL ýnıversıteti janyndaǵy arheologıalyq materıaldar ınstıtýtynyń lektorymyn. Londonnan Kembrıdjge arnaıy kelip, profesorlardyń ǵajap leksıasyn tyńdadym. Sol kezdegi baı-shonjarlar qaıtys bolǵanda, áıelderimen birge emes, analarymen, jıenderimen birge jerlengeni týraly bildim. Ol dáýir týraly áli de kóp nárseden beıhabar ekendigime kózim jetti», - dedi UCL ýnıversıtetiniń oqytýshysy Mılena Radıvovıch.
Qazaqstandyq ǵalymdar dáristen bólek Kembrıdj ýnıversıtetiniń laboratorıalaryn da aralady. Áriptesteriniń ǵylymı taldaý ádis-tásilderin kórip, tájirıbe almasýǵa shaqyrdy. Sondaı-aq ýnıversıtettiń oqý josparymen tanysyp, stýdent jáne ustaz almasýǵa ýaǵdalasty. Kembrıdj ýnıversıtetiniń ǵalymdaryn Qazaqstanǵa shaqyryp, ǵylymı ekspedısıaǵa birge qatysý jospary jasaldy.