Halyqty áleýmettik qamsyzdandyrýǵa 4 trln teńge qarastyrylǵan.
Zeınetaqy men járdemaqyny ınflásıaǵa saı ındeksteý úshin qosymsha 111 mlrd teńge bólinedi. Bul týraly QR Premer-Mınıstriniń orynbasary Eraly Toǵjanov Májilis depýtattarynyń aldynda málimdedi, dep habarlaıdy Almaty-akshamy.kz QazAqparatqa silteme jasap.
«Halyqty áleýmettik qamsyzdandyrýǵa 4 trln teńge qarastyrylǵan. Ol byltyrǵymen salystyrǵanda 230 mlrd. teńgege artyq. Keshe ǵana respýblıkalyq búdjettik komısıa Úkimetpen birge óte mańyzdy sheshim qabyldady. Inflásıa dáliziniń 8-10% deńgeıinde ózgerýine baılanysty zeınetaqy men járdemaqy mólsherin taǵy 4 paıyz ındeksteý kózdelip otyr. Sonyń jıyntyǵynda barlyq áleýmettik tólemder 2021 jylmen salystyrǵanda 9 paıyz, al yntymaqty zeınetaqy mólsheri 11 paıyz artady», - dedi Eraly Toǵjanov.
Aıtýynsha, atalǵan áleýmettik tólemder Qazaqstan boıynsha 4,2 mln. adamdy qamtıdy.
«Bul maqsatqa naqtylanǵan búdjet aıasynda qosymsha 111 mlrd. teńge qarastyryldy», - dedi Úkimet basshysynyń orynbasary.
Eske salsaq, Májilistiń jalpy otyrysynda atqarýshylyq is júrgizýdi jetildirýge baǵyttalǵan zań birinshi oqylymda maquldandy.
Sondaı-aq, Eraly Toǵjanov Májilis depýtattaryna ınflásıany tejeý baǵytyndaǵy sharalar týraly málimet berdi.