33 jastaǵy Elena Bondýro birneshe aı buryn Qazaqstanǵa kóship kelgen.
Nepaldaǵy ushaq apatynan qaza tapqandardyń arasynda Qazaqstanda turǵan Reseı azamaty boldy, dep habarlaıdy Almaty-akshamy.kz KTK arnasyna silteme jasap.
15 qańtarda Yeti Airlines áýe kompanıasynyń ATR 72 jolaýshylar ushaǵy Katmandý qalasynan Pokharýǵa ushyp shyqqan. Al qonaıyn dep jatqanda apatqa ushyraǵan. Bortta bolǵan barlyq jolaýshy men ekıpaj múshesi qaza tapty. Jolaýshylardyń arasynda Nepal, Úndistan, Ulybrıtanıa, Fransıa men Argentına azamattary boldy. Reseıdiń tórt azamaty qaıtys boldy. Bireýi sońǵy ýaqytta Qazaqstanda turǵan.
«Komsomolskaıa pravda» gazetiniń málimetine sáıkes, 33 jastaǵy Elena Bondýro Máskeý qalasynda turǵan. Birneshe aı buryn Qazaqstanǵa kóship kelgen. Elena trevel-bloger boldy. Qyzmeti – SMM-maman. Qashyqtan jumys istegen. Sondaı-aq qyzmet babymen shetelge jıi shyǵyp júrgen.
Sol kúni Elena Nepalda júrgen kúıeýi Maksımge bara jatqan. Tragedıaǵa deıin týystaryna aıaǵy aýyr ekenin aıtypty.