HQO-da mamandar keńesi usynylady
23 qańtardan bastap elimizge shetelden jetkizilgen avtokólikterdi zańdastyrý naýqany bastalady. Osy oraıda kólik ıelerine mamandandyrylǵan Halyqqa qyzmet kórsetý ortalyqtarynda İshki ister mınıstrligi Ákimshilik polısıa komıtetiniń jáne Qarjy mınıstrligi Memlekettik kirister komıtetiniń mamandary keńes beredi, dep habarlaıdy QazAqparat tilshisi.
«Sheteldik kólikti zańdastyrý úshin ótinishti «Elektrondyq úkimet» portaly arqyly nemese mamandandyrylǵan Halyqqa qyzmet kórsetý ortalyǵyna baryp berýge bolady. Ol úshin qyzmet kórsetý ortalyqtarynda arnaıy sektor uıymdastyrylady. Iaǵnı ol jerde tek sheteldik avtomobılderdi zańdastyrý ótinishi men qujattar qabyldanady», - dedi Astana qalasy polısıa departamenti Ákimshilik polısıa basqarmasynyń bastyǵy Eljan Chýpekov baspasóz máslıhatynda.
Sondaı-aq onyń aıtýynsha, avtoHQO-da ákimshilik polısıa qyzmetkeri de bolady.
«Ákimshilik polıseı qajet jaǵdaıda sheteldik kólikti zańdastyrýdyń tártibi men erejesin túsindiredi. Odan bólek Memlekettik kirister organynyń qyzmetkeri bolady. Atalǵan maman kedendik tólemderge qatysty saýaldarǵa jaýap beredi», - deıdi spıker.