2025 jylǵa qaraı 13 sý elektr stansasy, 34 jel jáne 12 kún stansasy salynady. Bul týraly Úkimet otyrysynda QR Energetıka mınıstri Bolat Aqsholaqov aıtty, dep habarlaıdy Almaty-akshamy.kz QazAqparatqa silteme jasap.
«Ekonomıkanyń ornyqty damý talaptaryna saı keletin energetıkalyq keshendi jańǵyrtý. İs-sharanyń basty maqsaty ekonomıka men halyqtyń elektr energıasyna qajettiligin jabý bolyp sanalady. Elektr qýaty naryǵy aıasynda mınıstrlik jasasqan 13 ınvestısıalyq kelisimdi iske asyrý jolymen jumys istep turǵan elektr stansalaryn jańǵyrtý júzege asyrylady. 1600 MVt qosymsha qýattar iske qosylatyn bolady. 2025 jylǵa qaraı eldiń ońtústik óńirlerinde manevrlik rejımi bar, jıyntyq qýaty shamamen 1 000 MVt bý-gaz qondyrǵylaryn salý jónindegi jobalardy aıaqtaý boljanyp otyr», - dedi mınıstr.
Onyń atap ótýinshe, 13 sý elektr stansasynyń, 34 jel jáne 12 kún stansasynyń qurylysy josparlanǵan. Bul 2025 jylǵa deıin 2 400 MVt ekologıalyq taza energıany óndirýge múmkindik beredi.
«Qazaqstannyń birtutas elektr energetıkalyq júıesi batys aımaǵynyń elektr jelilerin kúsheıtý úshin «KEGOC» AQ Batys Qazaqstan men Atyraý oblystary arasynda 220 kV tranzıttiń ekinshi tizbegin salý jónindegi jobany bastady. Sonymen qatar Almaty qalasynyń kabeldik jelilerin qaıta jańartý júrgiziletin bolady. Kózdelgen is-sharalar jańa generasıany qurýǵa jáne tozý deńgeıin 66 paıyzdan 62,7 paıyzǵa deıin tómendetýge, sondaı-aq 21 myńnan astam jumys ornyn qurýǵa múmkindik beredi», - dedi Bolat Aqsholaqov.