Densaýlyq saqtaý mınıstriliginiń basshylyǵy senbi kúngi karantın tártibin jeńildetýge qatysty túsinik berdi, dep habarlaıdy QazAqparat tilshisi.
Ortalyq komýnıkasıalar qyzmetinde «Atameken» UKP-nyń karantındik is-sharalardy jeńildetýge qatysty usynysy boıynsha suraq qoıyldy.
QR DSM sanıtarlyq-epıdemıologıalyq baqylaý komıtetiniń tóraǵasy Aıjan Esmaǵambetova bul másele turǵysynda aldaǵy bir aptada eldegi epıdemıologıalyq jaǵdaı nazarǵa alynatynyn atap ótti.
«Eger turaqtaný jaǵdaıy jalǵasatyn bolsa, onda kelesi senbiden bul sharalar qabyldanýy múmkin», - dedi komıtet basshysy.
Óz kezeginde Densaýlyq saqtaý mınıstri Alekseı Soı demalys kúnderindegi lokdaýnǵa qatysty pikir bildirdi.
«Bul máselege qatysty «Atameken» palatasy bizben birge talqylady. Eger bizde jaǵdaı turaqtasa, aldaǵy aptadan senbi kúnine qatysty jeńildetýdi qarastyryp otyrmyz. Atap aıtqanda, Almaty boıynsha ahýal kúrdeli, ólim-jitim men indet juqtyrý deńgeıi joǵary. Sondyqtan qazirgi kezdegi shekteý is-sharalary ondaǵy jaǵdaıǵa sáıkes kelip tur. Bul turǵyda adamdardyń ómiri mańyzdy. Osy jaǵdaıǵa erekshe mán berip otyrmyz. Eger múmkin bolsa, onda jeńildetý qadamdaryn jasap, bıznes úshin múmkindikterdi ashamyz», - dedi A. Soı.