Qazaqstan Respýblıkasy boıynsha áleýmettik qorǵaýdyń bas memlekettik ınspektory ortalyq memlekettik organ deńgeıinde bekitiletin bolady.
QR Áleýmettik kodeksiniń kúshine enýimen 2023 jyldyń 1 shildesinde memlekettik áleýmettik qorǵaý ınspektorlarynyń mártebesi, olardyń negizgi erejeleri, quqyqtary men mindetteri bekitildi, dep habarlaıdy Almaty-akshamy.kz QR Eńbek jáne halyqty áleýmettik qorǵaý mınıstrliginiń aqparatyna súıenip.
QR EHÁQM Eńbek jáne áleýmettik qorǵaý komıtetiniń aýmaqtyq departamentteriniń basshylaryna óńirler boıynsha bas memlekettik áleýmettik ınspektorlar mártebesi berildi.
Ár óńirde áleýmettik qorǵaýdyń qatardaǵy memlekettik ınspektorlarynyń shtaty bekitildi.
Áleýmettik qorǵaý memlekettik ınspektorlarynyń quzyretine: múgedektigi bar adamdardy áleýmettik qorǵaý, arnaýly áleýmettik qyzmetter kórsetý, áleýmettik qamsyzdandyrý, onyń ishinde zeınetaqymen qamsyzdandyrý jáne mindetti áleýmettik saqtandyrý salasyndaǵy zańnamanyń saqtalýyna áleýmettik tólemderdi ýaqtyly jáne durys taǵaıyndaý, «Azamattarǵa arnalǵan úkimet» memlekettik korporasıasy» KEAQ Áleýmettik tólemderdi alýshyǵa ýaqtyly jáne tolyq aýdarý bóliginde memlekettik baqylaýdy júzege asyrý kiredi.
Memlekettik baqylaý sýbektilerge júzege asyrylatyn bolady:
- arnaýly áleýmettik qyzmetter kórsetýdi júzege asyratyndar (qarttarǵa, múgedekterge arnalǵan úıler, ońaltý ortalyqtary, kúndizgi bolý ortalyqtary jáne t. b.);
- múgedektigi bar adamdardy tehnıkalyq ońaltý quraldarymen jáne kórsetiletin qyzmettermen qamtamasyz etý bóliginde jumyspen qamtý jáne áleýmettik baǵdarlamalar basqarmalary men bólimderi;
- múgedektigi bar adamdar úshin tolyq qoljetimdilikti qamtamasyz etý bóliginde memlekettik jáne jeke áleýmettik ınfraqurylym obektileri;
- «Azamattarǵa arnalǵan úkimet» memlekettik korporasıasy» KEAQ jáne «Memlekettik áleýmettik saqtandyrý qory» AQ fılıaldaryna zeınetaqylardy, járdemaqylardy jáne áleýmettik tólemderdi taǵaıyndaý, ýaqtyly jáne tolyq tóleý bóliginde tekserý.
Áleýmettik qorǵaý salasynda áleýmettik ınspektorlardy engizýmen kúsheıtiletin memlekettik baqylaý júıesi (Kásipkerlik jáne Áleýmettik kodeksterge sáıkes menshiktiń barlyq nysandarynyń obektilerin tekserýdi júzege asyrý) qurylǵanyn atap ótý qajet, bul 2025 jylǵa deıin múgedek adamdardyń ómir súrý sapasyn jaqsartý jónindegi ulttyq jospardy jáne QR Áleýmettik kodeksin iske asyrýda oń nátıje beredi.
Sondaı-aq, áleýmettik qorǵaý memlekettik ınspektorlaryna arnaýly áleýmettik qyzmet alýshylardyń ómiri men densaýlyǵyna qaýip tóndiretin, áleýmettik qyzmetkerlerge qoıylatyn biliktilik talaptary men talaptaryna sáıkes kelmeıtini anyqtalǵan jaǵdaıda, áleýmettik qyzmetkerdi jumystan ýaqytsha shettetý týraly fýnksıalar beriledi. Arnaýly áleýmettik qyzmet alýshylardyń ómiri men densaýlyǵyna qaýip tóndiretin faktiler anyqtalǵan jaǵdaıda, memlekettik ınspektorlar tekseriletin sýbektiniń laýazymdy adamdary men qyzmetkerlerin jumystan ýaqytsha shettetý týraly uıǵarym shyǵarýǵa ýákiletti bolady.