Jaýyngerlik jolyn jańadan bastaǵan kishi komandırlerdiń kóńil-kúıleri jaqsy.
Qarýly Kúshterdiń quramalary men bólimderine Shoqan Ýálıhanov atyndaǵy Qorǵanys mınıstrligi Áskerı kolejiniń túlekteri qyzmet ótkerý úshin kelýde, dep habarlaıdy Almaty-akshamy.kz.
«Joǵary bilimdi, áskerı istiń teorıasy men praktıkasyn jetik meńgergen kásipqoı serjanttar jeke quramdy oqytý men tárbıeleýdiń qyr-syryn meńgerýge kirisip ketti. Olar kún tártibine sáıkes, óz bólimsheleriniń qasynda bolyp, saptyq daıarlyqpen aınalysady», - delingen Qorǵanys mınıstrliginiń baspasóz qyzmetiniń habarlamasynda.
Baǵynystylardy qarýdy meńgerý daǵdylaryna úıretedi. Jaýyngerlik atystardy oryndaıdy jáne marsh jasaıdy. Basty maqsat boılaryndaǵy komandırge tán qasıetterdi kórsetý, baǵynystylar arasynda bedeldi bolý jáne jeke quramnyń qajettilikterin túsiný bilý.
«On birinshi synypty bitirgennen keıin áskerı jetekshiniń usynysymen Áskerı kolejge oqýǵa tústim. Endi, mine, Qonaev garnızonyndaǵy desanttyq-shabýyldaý quramasyna qyzmetimdi ótkerýge kelip otyrmyn. Munda bizdi óte jyly qarsy aldy, turmystyq máselelerdi tez arada sheshýge kómektesti», – deıdi bólimshe komandıri gvardıa kishi serjanty Albert Gorr.
Jas serjanttardy áskerı qyzmet jaǵdaılaryna tez arada beıimdeý, laýazymda qalyptasýy maqsatynda aldaǵy ýaqytta olarǵa oqý-ádistemelik jıyndar ótkiziletin bolady. Sabaq barysynda kishi komandırler áskerı bólimdegi qyzmetti uıymdastyrýdyń negizgi prınsıpterimen egjeı-tegjeıli tanysady.
Jaýyngerlik jolyn jańadan bastaǵan kishi komandırlerdiń kóńil-kúıleri jaqsy. Olar Áskerı kolejde tártipke, shydamdylyqqa úırengenin, oqytýshylar men komandırlerinen qajetti bilim alǵanyn atap ótti.
Búginde Shoqan Ýálıhanov atyndaǵy Qorǵanys mınıstrliginiń áskerı koleji kásibı serjanttardy daıarlaýdyń negizgi ortalyǵy bolyp tabylady. Kolej túlekteri Qarýly Kúshter men basqa da kúshtik qurylymdardyń qatarynda tabysty qyzmet etýde.