Bul sot Konstıtýsıanyń ústemdigin qamtamasyz etetin organ bolady.
Búgin Senattyń jalpy otyrysynda «Qazaqstan Respýblıkasynyń Konstıtýsıalyq Soty týraly» QR Konstıtýsıalyq Zańy qabyldandy, dep habarlaıdy Almaty-akshamy.kz QazAqparatqa silteme jasap.
Bul qujat Memleket basshysynyń 2022 jylǵy 16 naýryzdaǵy Joldaýyn iske asyrýǵa baǵyttalǵan.
«Konstıtýsıalyq Zań jobasynyń maqsattary Konstıtýsıalyq Sotty qurý bóliginde Konstıtýsıaǵa engizilgen ózgertýlerdi iske asyrý, memlekettiń quqyq qorǵaý ınstıtýttaryn kúsheıtý, Negizgi zań erejeleriniń qatań saqtalýyn qamtamasyz etý. Konstıtýsıalyq zań jobasy 3 bólimnen, 10 taraýdan jáne 67 baptan turady. Mazmuny boıynsha jobany eki bólimge bólýge bolady. Birinshisi – ol Konstıtýsıalyq Sottyń jáne onyń sýdıalarynyń mártebesi, olardyń kepildiktermen qamtamasyz etilýi. Al ekinshi bólim konstıtýsıalyq is júrgizý tártibine arnalǵan», - dedi QR Ádilet mınıstri Qanat Mýsın.
Konstıtýsıalyq Sot elimizdiń búkil aýmaǵynda Konstıtýsıanyń ústemdigin qamtamasyz etetin organ bolady jáne bıliktiń sot tarmaǵyna jatpaıdy, óıtkeni bul másele Konstıtýsıada túpkilikti sheshildi. Zań jobasynda Konstıtýsıalyq Sot sýdıalaryn taǵaıyndaý jáne olardyń ókilettikterin toqtatý tártibine baılanysty máseleler egjeı-tegjeıli reglamenttelgen.
«Atap aıtqanda, olardyń táýelsizdigi men kepildikteri de bekitilgen. Konstıtýsıalyq Sottyń quzyretteri Konstıtýsıanyń 72-babymen tikeleı rettelgen. Máselen, olarǵa saılaýdy ótkizýdiń durystyǵy máselelerin qaraý, Parlament qabyldaǵan zańdar men halyqaralyq sharttardyń respýblıka Konstıtýsıasyna sáıkestigin qaraý, sondaı-aq Konstıtýsıa normalaryna resmı túsindirme berý quzyreti jatqyzylǵan. Konstıtýsıaǵa engizilgen ózgeristerge sáıkes, Konstıtýsıalyq Sot azamattardyń ótinishteri boıynsha olardyń quqyqtary men bostandyqtaryna tikeleı qatysty normatıvtik quqyqtyq aktilerdi Konstıtýsıaǵa sáıkestigin qaraıtyn bolady. Sondaı-aq, Konstıtýsıalyq Sotqa júginý quqyǵy Bas prokýror men Adam quqyqtary jónindegi ýákilge berildi», - dedi mınıstr.
Qujattyń ekinshi bóliminde konstıtýsıalyq is júrgizýdiń jalpy sharttary men qaǵıdattary bekitildi. Konstıtýsıalyq Sotqa joldanatyn ótinishterdiń túrleri, olardyń nysany men mazmuny aıqyndaldy.
Konstıtýsıalyq Sottyń ótinishterdi qaraý tártibi bes kezeńnen turatyn bolady:
Konstıtýsıalyq Sot Apparatymen ótinishterdi aldyn ala qaraý;
konstıtýsıalyq is júrgizýge ótinishti qabyldaý;
otyrysqa daıyndyq kezeńi;
ótinishti qaraý boıynsha otyrys ótkizý;
sońǵy kezeń – ótinish boıynsha túpkilikti sheshim qabyldaý.