Atalmysh jattyǵý aǵymdaǵy jyldyń 10 qyrkúıeginde aıaqtalady.
Jambyl oblysyndaǵy «Aısha-Bıbi» oqý-jattyǵý polıgonynda Qazaqstan men Úndistan áskerı qyzmetshileri arasynda «QazÚndi-2021» birlesken oqý-jattyǵýy ótýde, dep habarlaıdy Almaty-akshamy.kz.
Oǵan Qazaqstannan «Ońtústik» óńirlik qolbasshylyǵynyń bólimsheleri jáne Úndistannyń qurama rotaǵa biriktirilgen áskerı kontıngenti qatysýda.
«Birinshi kezeńde jeke quram jaýyngerlik daıarlyqtyń joǵary deńgeıine keltirý is-qımyldaryn pysyqtady. Halyqaralyq bólimshelerdiń áskerı qyzmetshileri daǵdarys aýdanyna marsh jasady. Qazirgi ýaqytta mejeli jerde rotalyq taktıkalyq qurama top bólimshelerdi jaýyngerlik úılestirýdi oryndady», – delingen Qorǵanys mınıstrliginiń baspasóz qyzmetiniń habarlamasynda.
Oqý-jattyǵý sheńberinde qosymsha bólimsheniń áskerı qyzmetshileri barlaý-izdestirý jáne reıdtik is-qımyldar júrgizedi. Oqý-jattyǵýdyń sońǵy kezeńinde BUU-nyń mandatyna sáıkes daǵdarys aımaǵynda zańsyz qarýlanǵan toptardy oqshaýlaý jáne joıý josparlanǵan.
«QazÚndi-2021» birlesken oqý-jattyǵýy Qazaqstan men Úndistan qorǵanys mınıstrlikteri arasyndaǵy ekijaqty yntymaqtastyq jospary sheńberinde ótkizilýde. Ol aǵymdaǵy jyldyń 10 qyrkúıeginde aıaqtalady.
Oqý-jattyǵý sanıtarlyq-epıdemıologıalyq talaptardyń qatań saqtalýy arqyly ótýde. Oǵan qatysýshylar barlyq qajetti karantındik is-sharalardan, medısınalyq tekseristen ótip, PTR-test tapsyrdy.
