23 tamyzdan bastap jobany iske asyrýdyń úshinshi jylyna ótinimder qabyldandy.
Almaty ákimi Baqytjan Saǵyntaev megapolıs aktıviniń otyrysynda «Búdjetke qatysý» jobasynyń úlesin arttyrý bóliginde Prezıdent Joldaýynyń tapsyrmalaryn oryndaý sharalary týraly baıandady, dep habarlaıdy Almaty-akshamy.kz.
Memleket basshysy Qazaqstan halqyna Joldaýynda abattandyrý men turǵyn úı-kommýnaldyq sharýashylyǵynyń búdjetine «halyqtyń qatysýy» úlesin 10 esege arttyrýdy tapsyrdy.
Baqytjan Saǵyntaevtyń aıtýynsha, «Búdjetke qatysý» jobasy Almatyda ekinshi jyl júzege asyrylýda, 23 tamyzdan bastap jobany iske asyrýdyń úshinshi jylyna ótinimder qabyldandy.
Máselen, eki jyl ishinde saıabaqtar, skverler, aýlalardy abattandyrý, qoǵamdyq oryndardy jaryqtandyrý men jóndeýge quny 7,3 mlrd teńge bolatyn 322 joba (2020 j. - 49 joba, 2021 j. - 273 joba) júzege asyryldy.
Bul jobadaǵy búdjettiń úlesi 5%-dy quraıdy, bul belgilengen eń tómengi kólemnen 10 ese kóp. Eń tómengi kólem «turǵyn úı-kommýnaldyq sharýashylyq» fýnksıonaldyq toby úshin jyldyq búdjettiń 0,5%-ynan kem emes. Al eki aýdanda – Alataý men Naýryzbaıda búdjettiń úlesi eń tómengi shekti deńgeıden 15 ese joǵary.
«Bolashaqta «Búdjetke qatysý» jobasy aıasynda biz qarjylandyrýdy kóbeıtip qana qoımaı, atap aıtqanda, qalanyń shetki bóligi úshin jobalardy irikteý prosedýralaryn odan ári jetildirýdi josparlaýdamyz. Iaǵnı, jyl boıy turǵyndardyń usynystaryn jınaý josparlanýda», - dedi Baqytjan Saǵyntaev.