Sálem hat
Qazirgi zaman sarbazdary úı ishine degen saǵynyshyn qalaı jetkizedi? Olar óz saǵynyshyn hat arqyly jetkizetinin aıtty, dep habarlaıdy Almaty-akshamy.kz.
Qazirgi kúni bir-birine hat jazatyn jandar óte sırek shyǵar. Aqparattyq tehnologıa ómirimizge dendep engeli, qolymyzǵa qalam ustamaıtyn da boldyq. Oıymyzdy vatsap arqyly jaza salamyz, onyń ózinde de qaptaǵan smaılıkter-aq biz úshin «sóılep», «aıtyp» beredi barlyq jańalyqty. Tipti bolmasa, beıneqońyraý arqyly da tildese qoıamyz. Al QR Ulttyq ulan sarbazdary otbasyna degen saǵynyshyn hat arqyly jetkizdi. Káne, birge oqyp kóreıik.
Ulttyq ulannyń Almaty qalasyndaǵy 7552 áskerı bóliminde qyzmet etip jatqan qatardaǵy jaýynger Jumashev Yryskeldi Qıalbekuly Jambyl oblysyndaǵy Merki aýdanyna qarasty Merki aýylynda turatyn ata-anasy Qıalbek Tálipuly men Sáýle Eńsebekqyzyna bylaısha hat jazdy.
Amansyzdar ma, qymbatty meniń ákeshim, anashym?! Hal-jaǵdaılaryńyz, densaýlyqtaryńyz qalaı? Márıabúbi ájem qýatty otyr ma? Qylymgúl ápkem qalaı? Aýyl-el tegis aman ba?
Al ózime keletin bolsam, jaǵdaıym jaqsy. Áskerı qyzmet oıdaǵydaı. Almatyǵa kúz kelip, kún kózi kúńgirt tartyp tur. Mundaı aýa raıynyń azdap eńseni ezetini bar. Endi bir aıdyń kóleminde, Alla qalasa, qyzmetimdi aıaqtap, úıge oralamyn. Sol kúndi asyǵa kútip júrmin.
Ulttyq ulan qatarynda qyzmet etkenimdi árqashan maqtan etetin bolamyn. Men úshin ásker úlken mektep boldy. Eń bastysy, eń jaqyn adamdarym, ata-anam, baýyrlarym, týystarym jáne týǵan jerimdi burynǵydan beter qadirleı tústim. Ýaqyttyń qadirin bildim, eńbektiń nany tátti degendi túsindim. Áskerden men múldem basqa adamdaı, ómirge jańasha qaraıtyn azamat bolyp oralamyn! Áskerden oralyp jatqan meniń synyptastarym da solaı oılaıtyn shyǵar dep senemin.
Mama, papa, men sizderdi árqashan qurmet tutamyn! Kóriskenshe aman-saý bolyńyzdar!
Sálemmen, uldaryńyz Yryskeldi.
MENİ SHYŃDAI TÚSTİ
Ulttyq ulannyń Qyzylorda qalasyndaǵy 5547 áskerı bóliminde qyzmet etip jatqan qatardaǵy sarbaz Qońyrbaıuly Maqsattyń ákesi Qońyrbaı Muhamedıaruly men anasy Anargúl Ysqaqqyzyna joldaǵan sálem haty ne deıdi?
Sálem berdik, qurmetti papa, mama! Hal-jaǵdaılaryńyz qalaı? Mama, aýyrmaı, jaqsy júrsiz be? Meni ýaıymdaı bermeńiz. Meniń hal-jaǵdaıym jaqsy. Men er jigitpin ǵoı, Otan aldyndaǵy boryshymdy óteýge keldim. Bul – meniń mindetim. Sondyqtan, mama, siz kóp alań bolyp, oılaı bermeńiz! Meniń qyzmetim jaqsy. Áskerge kelgenim keshe sıaqty edi, mine, bir jylǵa jýyq ýaqyttyń qalaı ótkenin baıqamaı da qalyppyn. Áskerı qyzmet óte qyzyqty. Úırengenim de kóp, joldastarym da kóp. Komandırler bizge barynsha kóp bilim berip, myqty, rýhty bolýǵa tárbıeleýde. Áskerdiń tártibi meni shyńdaı tústi. Ulttyq ulan sarbazy bolǵanyma qýanamyn. Ulandaǵy qyzmetim meniń bolashaq ómirime úlken joldama bolatyn boldy.
Ózim týraly qysqasha osylaı. Aýyl-aımaq aman ba? Ótegendegi jaqyndar, Kegendegi týystardyń hal-jaǵdaılary qalaı? Bárine menen sálem aıtyńyzdar!
Sálemmen, uldaryńyz Maqsat.
QYMBATTYLARYM MENİŃ!
Ulttyq ulannyń Taraz qalasyndaǵy 5513 áskerı bóliminde qyzmet etip jatqan qatardaǵy Qusaıynov Hasen Qaıratulynyń ákesi Qaırat Qusaıynuly men anasy Gaýhar Áskerqyzyna joldaǵan sálem hatyn da oqyp kórsek.
Sálemetsizder me, anashym, ákeshim, inim, qaryndastarym! Densaýlyqtaryńyz jaqsy ma?
Áskerge kelgen alǵashqy aıdyń qıyn bolǵany ras, ant qabyldaǵan kúnnen keıin úırenip kettik. Tańerteń erte turý, áskerı tamaqqa úırenise almaý, uıqy da qanbaı, tátti-ashy jegimiz kelip, biraz del-sal kúıge túskenimiz taǵy shyndyq. Úıdi saǵynyp, quddy bir basqa álemge kelgendeı boldym.
Biraq namysqa tyrysyp, joldastardyń, komandırlerdiń kómegimen tez arada ásker ómirine tóselip úlgerdim. Ol kúnder de syrǵydy, artynan aılar ótti. Shyny kerek, áskerde ýaqyt degen zýlaıdy eken. Osylaısha apta artynan apta ótip, qyzmetimniń on birinshi aıyna da jetip qalyppyz. Buıyrsa, bir aıdan soń ózderińizge aman-esen oralamyn.
Ásker qyzyq pen shyjyqqa toly. Jańa dostar taptym. Ásker maǵan ata-ananyń, úıdiń qadirin túsinýdi úıretti, munda kelgenime esh ókinbeımin. Kezinde «áskerge baramyn» degenimde, maǵan qoldaý kórsetkenderińizge alǵys aıtamyn.
Kóriskenshe kún jaqsy bolsyn, qymbattylarym!
Sálemmen, uldaryńyz Hasen.