Prezıdenttikke kandıdat Qaraqat Ábdenniń el óńirlerindegi saılaýaldy saparlary jalǵasýda. Búgin ol Taraz qalasynyń saılaýshylarymen kezdesti.
Úıde patronajdyq qyzmet kórsetýdiń ámbebap jetildirilgen modeli aıasynda kandıdat patronajdyq medbıkelermen birge júkti áıelderdiń otbasylaryna bardy. «Januıa» emhanasynyń bas medbıkesi Sáýle Kaletaeva atap ótkendeı, patronajdyq qyzmettiń bul modeli ana men bala densaýlyǵyn baqylaýǵa alyp, zıandy faktorlardyń aldyn alýdy kózdeıdi. Júkti jáne bosanǵan áıelderdiń úılerin aralap, áleýmettik qyzmet kórsetý – óziniń nátıjeliligin dáleldegen mańyzdy baǵyt. Sondaı-aq kezdesý barysynda patronajdyq qyzmetkerler bul salada kásibı mamandardyń jetispeýshiligi jaıly sóz qozǵady.
Qaraqat Ábdenniń pikirinshe, áleýmettik mańyzy zor patronajdyq qyzmetke qoldaý kórsetý qajet.
«Ana men bala densaýlyǵy – ult baılyǵy. Júkti áıelderdiń densaýlyǵyna zıan keltiretin jaǵymsyz faktorlardy boldyrmaý kerek. Statısıkaǵa súıensek, jaǵdaıdyń qıyn ekendigin ańǵarýǵa bolady. Qazirgi kezde aýtızmmen aýyratyn balalardyń sany 20 ese ósken, orfandy jáne aýyr naýqasqa shaldyqqan balalar kóp. Sondyqtan bastapqy kezeńderden bastap profılaktıkalyq jumys júrgizip, kúrdeli máselelerdiń aldyn alý qajet. Osy oraıda patronajdyq qyzmettiń mańyzy zor, patronajdyq qyzmetkerlerdiń eńbegi suranysqa ıe. Alaıda bizdiń qoǵam patronajdyq medbıkelerdi kútýshi nemese qaraýshy retinde qabyldaıdy. Shyn máninde, patronajdyq medbıke – joǵary bilikti maman jáne qoǵam men memlekettiń olarǵa degen kózqarasy da basqasha bolǵany abzal. Patronajdyq qyzmetti qoldaý úshin naqty sharalar qabyldanyp, onyń mártebesin arttyrý maqsatynda halyq arasynda aqparattyq-ıdeologıalyq jumys júrgizý kerek», - dedi kandıdat.
Eske salsaq, elimizde 20 qarasha kúni kezekten tys prezıdent saılaýy ótedi. Kandıdat Q.Ábden el aımaqtaryn aralap, 10 oblysta 40-dan astam kezdesý ótkizdi.