QR Eńbek jáne halyqty áleýmettik qorǵaý vıse-mınıstri Vıktorıa Shegaı Shyǵys Eýropa men Ortalyq Azıa elderindegi Halyqaralyq eńbek uıymynyń Laıyqty eńbek máseleleri boıynsha tehnıkalyq qoldaý toby men Óńirlik búrosynyń dırektory Mıhaıl Pýshkınmen kezdesý ótkizdi, - dep habarlaıdy Aqshamnews.kz.
Kezdesý barysynda taraptar qazaqstandyqtardyń áleýmettik qorǵalý deńgeıin arttyrýǵa baǵyttalǵan vedomstvonyń qyzmeti týraly pikir almasty.
Óz sózinde Vıktorıa Shegaı Qazaqstanda laıyqty eńbekti ilgeriletý jónindegi Jol kartasynyń iske asyrylý barysy, HEU konvensıalaryn ratıfıkasıalaý boıynsha júrgizilip jatqan jumystar týraly habardar etip, sondaı-aq qyzmetkerler men jumys berýshiler múddeleriniń teńgerimin qamtamasyz etýge negizdelgen eńbek qatynastaryn retteýdiń ulttyq modeli jáne onyń damýy jaıynda baıandady.
«Qazaqstanda áleýmettik áriptestik ınstıtýty belsendi jumys isteıdi. Ol uzaq jyldar boıy kelissózder júrgizýdiń tıimdi tetigi retinde ózin dáleldep, áleýmettik-eńbek salasyndaǵy máselelerdi sheshýde eleýli áleýetke ıe. Bul ınstıtýt áleýmettik-eńbek qatynastaryn retteý máseleleri boıynsha taraptardyń múddelerin kelisýdi qamtamasyz etedi jáne teń quqyqty yntymaqtastyq qaǵıdattaryna negizdeledi», – dedi Shegaı.
Vıse-mınıstr elimizde respýblıkalyq, óńirlik jáne salalyq deńgeılerde áleýmettik áriptestik organdary – memlekettik organdardyń, jumys berýshiler men jumyskerlerdiń ókilderinen parıtettik ókildik, ókilettilik, teń quqyqtylyq jáne taraptardyń ózara jaýapkershiligi qaǵıdattary negizinde qalyptastyrylatyn úshjaqty komısıalar jumys isteıtinin atap ótti.
Sóz sońynda Vıktorıa Shegaı Qazaqstan áleýmettik ádilettilikti nyǵaıtýǵa, ádil eńbek jaǵdaılaryn jasaýǵa jáne shyǵý tegi, áleýmettik mártebesi men jynysyna qaramastan barshaǵa teń múmkindikter qamtamasyz etýge erekshe mán beretinin eske saldy.
«Biz áleýmettik ádilettilik negizinde jalpyǵa ortaq jáne berik beıbitshilikti ornatýǵa baǵyttalǵan Áleýmettik ádilettilik úshin jahandyq koalısıaǵa qosyldyq. Onyń maqsattary men mindetterin ilgeriletý úshin HEU-men, úkimettermen, jumyskerler men jumys berýshiler birlestikterimen belsendi jumys júrgizýge nıettimiz», – dedi vıse-mınıstr.
Óz kezeginde Mıhaıl Pýshkın halyqaralyq tájirıbe men HEU konvensıalaryn eskere otyryp, ulttyq zańnamany jetildirý baǵytyndaǵy jumystyń tıimdiligin jáne oń serpinin atap ótip, osy baǵyttaǵy yntymaqtastyqty keńeıtý múmkindikterin qarastyrýdy usyndy.